Búgin Otan qorǵaýshylar kúni qarsańynda Ulttyq ulannyń 5573 áskerı bóliminiń aýmaǵynda «Ashyq esik kúni» ótti. Is-sharaǵa № 69 mektep-gımnazııasynyń joǵary synyp oqýshylary, sondaı-aq «Qyzmet» salalyq kásipodaǵynyń ortalyq jáne astanalyq keńesteriniń eńbek ujymdary men olardyń balalary shaqyryldy.
Is-shara patrıottyq sezimdi, Otanǵa degen súıispenshilikti, jastardyń óz eńbegimen qyzmet etýge jáne eliniń múddelerin qorǵaýǵa daıyndyǵyn qalyptastyrýdy maqsat tutqan. Sonymen qatar jasóspirimder arasynda áskerı qyzmettiń mańyzy men jaýapkershiligin nasıhattap otyr.
Jıyn barysynda 5573 áskerı bólimi men Nur-Sultan qalasynyń №69 mektep-gımnazııasy arasynda yntymaqtastyq týraly Memorandýmǵa qol qoıyldy. Atalǵan qujatqa sáıkes, oqýshylar «Jas búrkit» sporttyq áskerı-patrıottyq klýbynyń múshesi atandy.
