«Qazgıdromet» málimetinshe, elimizdiń batysynda aýa temperatýrasynyń tómendeýine sebep bolǵan soltústik-batys antısıklony respýblıkanyń soltústik-batys, soltústik, ortalyq aımaqtaryna odan ári qaraı jyljýyn jalǵastyrady.
Termometr baǵandary túngi ýaqytta 6 gradýs aıaz - 5 gradýs jylyǵa deıin, Qaraǵandy oblysynyń ońtústiginde 10-15 gradýs jylyǵa, kúndiz 7-23 gradýs jylyǵa deıin tómendeıdi. Túnde jáne tańerteń tuman kútiledi.
Qazaqstannyń ońtústik jartysyna keler bolsaq, munda ońtústik sıklon áserinen jańbyr jaýady, keı jerlerde qatty jaýyn, naızaǵaı, burshaq, daýyl bolady, jeldiń kúsheıýi - 15-20, ekpini sekýndyna 23-28 metr bolady.
«Ob shyǵanaǵy aımaqtarynan keletin sıklonnyń áserinen 5 mamyrǵa taıaý respýblıkanyń basym bóliginde turaqsyz aýa raıy saqtalady, sáıkesinshe naızaǵaı oınap, jańbyr jaýady, jeldiń jyldamdyǵy sekýndyna 15-20 metrge deıin jetedi», dedi «Qazgıdromet» ókilderi.
Jalpy, respýblıkanyń basym bóliginde mamyrdyń basynda aýa temperatýrasynyń aıtarlyqtaı tómendeýine qaramastan, ol aqyryndap kóteriledi, aptanyń sońyna qaraı kúndiz aýa temperatýrasy 13-25 gradýs jyly bolady. Eldiń ońtústiginde, ońtústik-shyǵysynda aıtarlyqtaı temperatýra aýytqýy kútilmeıdi.
