«6 mamyrda elordadaǵy «Qazaqstan» konsert zalynda Memleket basshysy Qasym-Jomart Toqaevtyń qatysýymen merekelik konsert ótedi. Onda Prezıdent ardager áskerı qyzmetshilerdi, qatardaǵy áskerı qyzmetkerlerdi, sondaı-aq, barsha qazaqstandyqtardy merekemen quttyqtaıdy. Sonymen qatar elimizdiń barlyq óńirinde Jeńis kúnine oraı «Qurmet» memorıaldy monýment aldyna gúl shoqtary qoıylyp, qurmet kórsetý josparlanýda», dedi Qazaqstan Qarýly kúshteri bas shtaby basshysynyń orynbasary, tárbıe jáne ıdeologııalyq jumys jónindegi departament basshysy, general-maıor Serik Boranbaev.
Onyń aıtýynsha, 7 jáne 9 mamyr kúnderi ótetin is-sharalar óskeleń urpaqty patrıottyq tárbıeleýge, urpaqtar sabaqtastyǵyn qamtamasyz etýge jáne Otan úshin qaza tapqandardyń erligin este saqtap, taǵzym etýge baǵyttalǵan.
«Sondaı-aq Memleket basshysnyń qatysýymen 9 mamyrda Nur-Sultan qalasyndaǵy «Otan qorǵaýshylar» monýmentine gúl shoǵyn qoıý rásimi ótedi. Atalǵan dástúr elimizdiń barlyq óńirinde uıymdastyrylady», dedi ol.
