Qazaqstan • 03 Mamyr, 2022

Almatyda 40 adamdy kene shaqqan

64 ret kórsetildi

Almatyda sáýir aıynda qalalyq jedel-shuǵyl kómek kórsetý aýrýhanasyna kene shaqqan 40 adam túsken, dep habarlaıdy Egemen.kz «Habar 24» arnasyna silteme jasap.

Olardyń barlyǵyna kene ımmýnoglobýlıni salynǵan.

Al jyl basynan beri eki adamnan kene ensefalıty tabylǵan. Mamandardyń aıtýynsha, sáýir men maýsym aılarynda qaýipti jándikter belsendi bolady. Almatyda kene shaǵý yqtımaldyǵy joǵary aımaqtarǵa Kóktóbe, Medeý jáne Alma-arasan shatqaldary jatady. Sondyqtan dárigerler tabıǵatqa shyqqanda abaı bolýdy eskertedi. Aq tústi jabyq kıim kıgen jón. Eger kene shaqsa, alǵashqy 72 saǵatta dárigerge kóriný qajet. Zııankesti aýrýhanaǵa ózimen birge shyny ydysqa salyp alyp kelgeni jón. Sebebi, tabıǵattaǵy kenelerdiń 1,5-2 prosentinde ǵana kene ensefalıtynyń qozdyrǵyshy bolady. Ony tek zerthanada tekserýge múmkindik bar.  

 – Kene aýrýynyń qaterliligi sonda ol aýrý kezinde kene aýrýynyń qozdyrǵyshy arbavırýstar ortalyq júıke júıesin zaqymdaı otyryp, óte aýyr túrde ártúrli saldarlar týyndatýy múmkin. Sondyqtan, saldanýdyń áserinen adam kemtar bolyp qalýy múmkin. Sondyqtan kene ensefalıtyna óte durys kózqaraspen qarap, ony aldyn-ala boldyrmaý qajet, - deıdi qalalyq Qoǵamdyq densaýlyq basqarmasynyń shtattan tys bas ınfeksıonısi Ádil Qatarbaev.

Sońǵy jańalyqtar

Uqsas jańalyqtar