Memleket basshysy joǵary oqý ornynyń bilim berý, ǵylymı-zertteý jumystarymen jáne ýnıversıtetti odan ári damytý strategııasymen tanysty.
Qasym-Jomart Toqaevqa kampýsty, ǵylymı ortalyqtar men zerthanalardy damytý jospary kórsetildi. Sonymen qatar Qazaqstan Prezıdentine ǵylym, densaýlyq saqtaý, sıfrlandyrý, aýyl sharýashylyǵy, ekologııa jáne sport salalaryndaǵy ártúrli bilim berý jobalary men baǵdarlamalary tanystyryldy. Ýnıversıtet osy jobalar men baǵdarlamalar arqyly Memleket basshysynyń bastamalaryn júzege asyrýǵa óz úlesin qosyp keledi.
Qasym-Jomart Toqaevqa ýnıversıtettiń sheteldik jetekshi ǵylymı, bilim berý ortalyqtarymen yntymaqtastyǵy, medısına jáne ınnovasııalyq klasterlerdiń jumystary, sondaı-aq oqý orny túlekteriniń startap-jobalary jóninde málimet berildi.
Memleket basshysy Aqyldy júıeler jáne jasandy ıntellekt ınstıtýtynyń jobalarymen jáne Energetıkalyq ǵarysh zerthanasynyń qyzmetimen tanysty.
Oqý ornyn aralap kórgen Qasym-Jomart Toqaev stýdenttermen áńgimelesip, ýnıversıtettiń qurmetti qonaqtar kitabyna qoltańbasyn qaldyrdy.
