Muny aýyldyqtar jaqsylyqqa balap otyr. Buryndary da kóktem shyǵa aqqý qusy ózen-kólderdiń jaǵasyna qonatyn. Al aýyl irgesindegi aıdynda tuńǵysh ret alańsyz terbelip júr. Adamnan úrikpeıdi. Soǵan qaraǵanda qalyń jynys arasyna uıa salyp, balapan basyp jatqan kórinedi.
– Baıaǵyda aýyldyń irgesine qaraqý kelip qonǵan eken. Ony biz kórgen joqpyz, úlkender aıtyp otyrady. Keıin joǵalyp ketipti. Al aqqý birinshi ret qondy. Aýylda burynǵydaı asyr salǵan bala az, gúrildegen tehnıka joq. Onyń ústine parktiń aýmaǵy. Eshkim úrkitpeıdi. Ony qus ta sezedi, – deıdi Shyńǵystaı aýylynyń turǵyny Abylaı Iаýadantegi.
Inspektorlardyń qorǵaýynda bolsyn, bolmasyn, aqqýǵa qazaq álimsaqtan tıispeıdi. Aqqý, qarlyǵash, búrkit sekildi qustardy qasıetti dep sanaıdy. Al aqqý – qustardyń ishinde juptasyp ómir súretin birden-bir qus. Biri ajal qushsa, ekinshisi jup izdemeıdi. Sondyqtan da shyǵar, úılengen jastar bir-birine adal bolsyn dep, aqqýdyń mahabbatyn tilep jatady. Sulý qyzdardy aqqýǵa teńeıtinimiz jáne bar. Qalaı degenmen, erekshe qus. Jalpy, jer betinde aqqýdyń alty-jeti túri bar. Onyń beseýi Soltústik jartyshardy mekendese, bireýi ekvatordyń ońtústik betin qonys etedi eken. Elimizdegi aıdyndardy mekendeıtin ekeýi – sybyrlaq jáne suńqyldaq aqqýlar.
Shyńǵystaıdyń shetine qonǵan aqqýlar kúzge qaraı jyly jaqqa qaıta ushady. Qos aqqý ǵana emes, balapandary erte ushady. Aýyl irgesi jaıly bolsa, keler jyly birnesheýi qaıta ushyp kelýi múmkin. Bul – tabıǵat tynyshtyǵyn saqtap júrgen qoryqshylardyń boljamy.
