Muhıttyń arǵy betinde jalaýy jelbiregen PFL týrnırinde 29 jastaǵy Zámzagúl Faızollanova óziniń tusaýkeser kezdesýin ótkizdi. Kezinde elimizdiń tanymal dzıýdoshylarynyń biri bolǵan Shyǵys Qazaqstan oblysynyń týmasy 2015 jyldan beri aralas jekpe-jekpen shuǵyldanýda. «Bopaı» degen búrkenshik esimmen tanylǵan qazaq qyzy sol aralyqta segiz kezdesý ótkizip, tek bireýinde ǵana utylǵan edi. Bul joly Zámzagúldiń joly bolmady. Ol 27 jastaǵy Larıssa Pachenkomen kúsh synasty. Brazılııa ókiliniń osy sport túrin serik etkeli 10 jyldan asty. Sol kezden beri ol 20 ret oktagonǵa shyǵyp, 16 márte jeńis toıyn toılady. О́kinishke qaraı, Arlıngtonda ótken báseke uzaqqa sozylmady. Pachenko birinshi raýndta-aq Faızollanovany aýyr soqqylardyń astyna alyp, aıqyn jeńiske qol jetkizdi.
Ekaterınbýrgtegi RCC 11 týrnırinde Ilııas Hamzın Vıktor Fıgeıredomen aıqasty. Reseıdiń Omby oblysynda týyp-ósken qandasymyz qarsylasyn bir mınýtqa jetkizbeı uryp jyqty. Osylaısha, Ilııas qatarynan tórtinshi jarysta Brazılııadan kelgen sportshylardy san soqtyrdy.
