Sonymen qatar Senat Spıkeri dańqty qolbasshy Baýyrjan Momyshulynyń rýhyna taǵzym etip, eskertkishine gúl shoǵyn qoıdy. Sondaı-aq qala turǵyndarymen birge aty ańyzǵa aınalǵan batyr men Uly Otan soǵysy jyldarynda qaza tapqan qazaqstandyqtardy bir mınýt únsizdikpen eske aldy.
Buǵan deıin Máýlen Áshimbaev óziniń Facebook áleýmettik jelisindegi paraqshasynda jurtshylyqty Jeńis kúnimen quttyqtap, Ekinshi dúnıejúzilik soǵysta qazaqstandyq jaýyngerler qaharmandyq pen qaısarlyqtyń ozyq úlgisin kórsetkenin aıtqan edi.
«Biz Jeńis kúnin atalarymyz ben ákelerimizdiń erlikterin umytpaı, olardy dáripteý úshin atap ótemiz. Osy kúni soǵys saldarynan qaza tapqan mıllıondaǵan qurbandardyń rýhyna taǵzym etemiz. Bul kún aǵa býynnyń fashızmdi jeńý úshin qandaı qıyndyqtardy eńsergenin umytpaý úshin de mańyzdy. Sondaı-aq osy mereke beıbitshilik pen turaqtylyqtyń qadirin arttyra túsedi», dedi Máýlen Áshimbaev.
Jyl saıyn tarıhtyń jańa paraǵy ashylyp, soǵys jyldarynda erligimen kózge túsken qazaqstandyqtar týraly tyń derekter men málimetter jarııalanyp jatyr. Osyǵan oraı Jeńis kúni qarsańynda el Prezıdentiniń Jarlyǵymen soǵysta kórsetken erligi men qaharmandyǵy úshin Tóleýǵalı Ábdibekov, Aleksandr Nesmııanov jáne Ybyraıym Súleımenovke «Halyq qaharmany» ataǵy berilgeni belgili. Senat Spıkeri bul oqıǵany tarıhı ádildiktiń qalpyna kelýi dep atap ótti.
Sonymen qatar Palata Tóraǵasy elimizge amandyq, jerimizge tynyshtyq jáne barsha qazaqstandyqqa zor densaýlyq pen baq-bereke tiledi.
Aıana Toǵanbek
