Aımaqtar • 11 Mamyr, 2022

Júıkesi syr bergen orynbasarǵa sógis jarııalandy

34 ret kórsetildi

Memlekettik qyzmetshi qarapaıym bolyp, jalpyǵa birdeı qabyldanǵan moraldyq-ádeptik normalardy saqtaýǵa, shyndyqqa sáıkes kelmeıtin málimetterdi taratpaýǵa, azamattarmen qarym-qatynasta ádeptilik tanytýǵa, dórekilik, qadir-qasıetin kemsitý, ádepsizdik jáne beıádep minez-qulyq faktilerine jol bermeýge, ózderiniń áreketterimen jáne minez-qulqymen olardyń tarapynan synǵa sebepker bolmaýǵa tıis. Memlekettik qyzmetshilerge qatysty zań talabynda osylaı jazylǵan.

Alaıda óziniń teris áreketi arqyly synǵa ushyraýy bylaı tursyn, máselesi Ádep keńesinde, sottarda qaralyp jatqan sheneýnikter qanshama?! Túrkistan obly­syndaǵy Ádep jónindegi keńes oty­ry­synda memlekettik qyzmetshige qoıy­la­tyn etıka talaptaryn saqtamaǵan, jer telimin berý zańdylyǵyn buzǵan sheneýnikterdiń tártiptik isi qaraldy. Sary­aǵash aýdany ákiminiń orynbasary Nurpolat Talıpov kópshilik aldynda aýdannyń sý sharýashylyǵy mekemesiniń bastyǵyna dóreki, balaǵat sózderdi aıt­qan. Bul Saryaǵash aýdany ákimi apparatynyń jospardan tys tekserýi kezinde dálelin tapqan. Jınalys barysynda qajetti aqparatty bere almaǵan mekeme basshysyna emosııamen ashý ús­tin­de dórekilikke jol berip qoıǵanyn N.Talıpovtiń ózi de moıyndaǵan. Al joǵa­rydaǵy basshydan balaǵat sóz estip qalǵan sheneýnik Talıpovqa qoıar esh­qan­daı kiná­siniń joqtyǵyn málim etken. De­­gen­men keleńsiz oqıǵa Ádep jó­nin­de­gi keńeste qaralyp, tıisti sheshim qa­byl­­­dandy.

«Jumys barysynda adamnyń keıde ashýǵa beriletinin joqqa shyǵarýǵa bolmaıdy. Biraq memlekettik qyzmet júıkeniń juqalyǵyn kótermeıtinin este ustaǵan abzal», dedi Memlekettik qyz­met isteri agenttiginiń Túrkistan ob­­lysy boıynsha departament basshy­sy, Ádep jónindegi keńes tóraǵasy Aıbek Shilmanov. Keńes múshe­leriniń sheshimimen, Saryaǵash aýda­ny ákiminiń orynbasary Nurpolat Talıpovke «sógis» jazasyn berý týraly usynys aýdan ákimine joldandy.

Sońǵy ýaqytta aýyl ákimderine qatys­ty isterdiń deni jermen baılanysty bolyp otyr. Paramen ustalyp, sot­tal­ǵan da, qyzmetten ketýge negiz bol­ǵan jaıttar da jer máselesine baryp tireledi. Bul joly Ádep keńesinde jerge qatysty tórt sheneýniktiń isi tal­qy­landy. Jetisaı aýda­ny Jyly sý aýyldyq okrýginiń ákimi Ermek Daýyl­baev pen atalǵan aýyldyq okrýg ákimi appa­ratynyń bas maman-zańgeri Saparǵalı Abdýllaev jerge qatysty biraz keleńsizdikterge jol bergen. Naqtyraq aıtqanda, sheneýnikter jer telimin satyp berý týraly ótinishter boıynsha usynylýy tıis qujattar paketin tolyq tapsyrmaǵan, jer paıdalanýshylardyń ótinishterin qanaǵattandyrý jáne ol bo­ıynsha sheshimderdi ýaqtyly qabyl­da­maý faktilerine jol bergen. Tek­se­rý barysynda sondaı-aq qury­ly­sy aıaqtalmaǵan nysandar boıynsha paı­da­la­nýǵa qabyldaý aktisin esepke alý, jer telimin jekemenshik quqyǵymen beki­tip berý týraly sheshimder qabyldaý, jeke jáne zańdy tulǵalarǵa quqyqtary men zańdy múddelerin iske asyrýyna ashyq ke­dergi jasaý jaıttary anyqtalǵan. Osy­ǵan uqsas faktilerge Jetisaı aýdany Qaraqaı aýyldyq okrýginiń ákimi Báıdibek Imanberdıev, atalǵan aýyldyq okrýg ákimi apparatynyń bas maman-zańgeri Saparǵalı Bıshoraev ta jol ber­gen. Tórt sheneýnik qyzmetine tolyq sáıkes emestigi týraly eskertý jazasyna usynyldy.

 

Túrkistan oblysy

Sońǵy jańalyqtar

Suıytylǵan gaz baǵasy óspeıdi

Qoǵam • 01 Shilde, 2022

Uqsas jańalyqtar