«Halyqqa aqparat berý maqsatynda Qnet kompanııasynyń qyzmetine qatysty QR Qylmystyq kodeksi 217-baby («Qarjylyq (ınvestısııalyq) pıramıdany qurý jáne oǵan basshylyq etý») boıynsha Almaty qalasy PD Sotaldy tergep-tekserýlerdiń biryńǵaı tizilimine tirkelgen qylmystyq is tergelip jatqanyn habarlaımyn», dep jazdy ol Telegram-kanalynda.
Rýstam Ábdirahmanovtyń málimetinshe, tergeý barysy QR Bas prokýratýrasy, Ishki ister mınıstrligi, Almaty qalasy prokýratýrasy men Polısııa departamenti basshylyǵynyń erekshe baqylaýynda, jedel izdestirý sharalary júrgizilip jatyr.
«Qnet QR zańnamasynyń talaptaryna sáıkes kásipkerlik qyzmet júrgizbeıdi, kompanııanyń banktik jáne ınvestısııalyq qyzmetti júzege asyrýǵa lısenzııalary men ózge de ruqsat qujattary, sondaı-aq bank operasııalary joq.
Halyqtan qyraǵy bolýyn jáne qarjy resýrstaryn ınvestısııalaýdy qadaǵalaýdy suraımyn. Quqyq qorǵaý organdaryna Qnet kompanııasy materıaldyq shyǵyn keltirgeni týraly aryzben 220-dan asa adam júgingen», dedi Almaty PD basshysynyń orynbasary.
