Oblystyq polısııa departamentiniń málimetinshe, tártip saqshylary urlanǵan sheteldik kólikpen qashyp ketpek bolǵan kólik urysynyń ustalǵan sátin vıdeoǵa túsirip alǵan. Patrýl qyzmetkerleri kúdiktini kólikten shyǵyp qashyp ketkenshe qýyp, kópqabatty úılerdiń aýlasynda qolǵa túsirgen.
«Ustalǵan oqýshynyń Mitsubishi Galant, BMW jáne Mazda-626 urlyǵyna qatysy bar ekeni anyqtaldy. Atalǵan derek 16 mamyrda tirkeldi. Kólikterdiń biri Almaty qalasynyń shetinen, ekinshisi Kóksý aýdanyndaǵy Alǵabas aýylynyń mańyndaǵy aryqtan tabyldy», delingen PD habarlamasynda.
Qazir QR Qylmystyq kodeksiniń 200-baby (kólik aıdap áketý) boıynsha qylmystyq is qozǵaldy. Ustalǵan jasóspirim ýaqytsha ustaý ızolıatoryna qamaldy.
Aıta keterligi, jasóspirim tolyq emes otbasynan shyqqan. Belgili bolǵandaı, kámeletke tolmaǵan balanyń anasy jalǵyz ózi 4 balany tárbıelep otyr. Jastyǵyna qaramastan, kúdikti túrli quqyqbuzýshylyq jasaǵany úshin birneshe ret polısııa bólimine jetkizilgen.
