Elordalyq JOO-da konstıtýsııalyq túzetýler men aldaǵy referendým talqylandy

Jıynǵa Eýrazııa ulttyq ýnıversıtetiniń prorektory Dıhan Qamzabekuly, «Turan-Astana» ýnıversıtetiniń rektory, Nur-Sultan qalasy máslıhatynyń depýtaty Gúljamal Japarova, «Astana medısına ýnıversıtetiniń» prorektory Janar Bókeeva, Eýrazııa gýmanıtarlyq ınstıtýty rektorynyń m.a. Amangeldi Ismaıylov, L.N. Gýmılev atyndaǵy EUÝ quqyq teorııasy men tarıhy, konstıtýsııalyq quqyq kafedrasynyń professory, Astana Medısına Ýnıversıtetiniń Medısınalyq quqyq jáne etıka kafedrasynyń professory Jamaladen Ibragımov jáne EUÝ jaratylystaný ǵylymdary fakýltetiniń oqytýshylary qatysty. Kezdesýge qatysýshylar Konstıtýsııanyń el damýyndaǵy rólin, sol sııaqty «Jańa Qazaqstandy» qurýdaǵy konstıtýsııalyq reformanyń mańyzdylyǵyn atap ótip, óziniń belsendi azamattyq ustanymyn bildirdi.

«29 sáýirde Memleket basshysy Qasym-Jomart Toqaev Qazaqstan halqy Assambleıasynyń XXXI sessııasynda sóılegen sózinde Konstıtýsııaǵa túzetýler engizý jóninde referendým ótkizýdi usyndy. Prezıdent Qazaqstandaǵy referendým sońǵy ret 1995 jyly, qoldanystaǵy Konstıtýsııa bekitilgen kezde ótkenin atap ótti. Otyrysqa qatysýshylar jańa Qazaqstandy qurýdaǵy referendýmnyń negizgi rólin talqylady, sondaı-aq daýys berý qorytyndylary eldegi qoǵamdyq-saıası jaǵdaıǵa qalaı áser etetinine taldaý jasady», dep atap ótti «Turan-Astana» ýnıversıtetiniń rektory, Nur-Sultan qalasy máslıhatynyń depýtaty Gúljamal Japarova.

О́z kezeginde L.N. Gýmılev atyndaǵy Eýrazııa ulttyq ýnıversıtetiniń quqyq teorııasy men tarıhy, konstıtýsııalyq quqyq kafedrasynyń professory, Astana Medısına ýnıversıtetiniń Medısınalyq quqyq jáne etıka kafedrasynyń professory Jamaladen Ibragımov konstıtýsııalyq túzetýler jaıly aıtyp ótti.

«Memleket basshysy «Jańa Qazaqstan – Ádiletti Qazaqstan» ekenin birneshe ret atap ótti. Al ádilettilikke azamattardyń quqyqtary jan-jaqty saqtalǵan jáne qorǵalǵan jaǵdaıda ǵana qol jetkiziledi. Adam quqyqtaryn qorǵaý ınstıtýttarynyń rólin arttyrý úshin Konstıtýsııaǵa adam quqyqtary jónindegi ýákil týraly derbes bap (83-1-bap) engiziledi. Reformalar Bas prokýratýranyń ókilettigin keńeıtip, rólin kúsheıtedi. Sýdıa laýazymyna arnalǵan konkýrstyń onlaın-translıasııa praktıkasyn engizý, sondaı-aq onyń qorytyndylary boıynsha egjeı-tegjeıli, dáleldi túsindirmelerdi jarııalaý usynylady», dedi professor.

Kezdesýge qatysýshylar Memleket basshysy Qasym-Jomart Toqaevtyń Qazaqstan halqy Assambleıasynyń «El birligi – jańarǵan Qazaqstannyń tiregi» HHHI sessııasynda aıtylǵan Konstıtýsııaǵa ózgerister men tolyqtyrýlar engizý úshin respýblıkalyq referendým ótkizý týraly usynysyn biraýyzdan qoldady.

Aıta ketý kerek, Qazaqstan Respýblıkasy Joǵary oqý oryndarynyń qaýymdastyǵy – elimizdiń 81 akkredıttelgen joǵary oqý ornyn biriktiretin kommersııalyq emes uıym. Onda respýblıkanyń barlyq stýdentteriniń 86%-dan astamy oqıdy.

Uıymnyń mıssııasy Qazaqstannyń, TMD elderiniń serpindi áleýmettik-ekonomıkalyq damýyna jáne álemniń damyǵan elderiniń bilim deńgeıine jaýap beretin bilim berý sapasyn arttyrý bolyp sanalady.

Aıana Toǵanbek