Májilis depýtattary Elnur Beısenbaev pen Mádı Ahmetovtiń Almaty qalasyndaǵy elimizdegi jetekshi joǵary oqý oryndardyń biri Qazaq bas sáýlet-qurylys akademııasynyń ujymy jáne stýdentterimen kezdesýi kezinde osyndaı oılar aıtyldy. Kezdesý kezinde depýtattar Memleket basshysy usynǵan saıası reformalar, Konstıtýsııaǵa engizilgen túzetýler týraly jan-jaqty túsindirip ótti.
«Konstıtýsııa – kez kelgen memlekettiń irgetasy. Qazirgi qoǵamda ózgerister úlken suranysqa ıe. Referendým ótetin kúnge az ǵana ýaqyt qaldy. Árbir azamat el damýynyń jańa kezeńin qalyptastyrýǵa qatysyp, úlesin qosýǵa múmkindik týdy», dedi Elnur Beısenbaev. E.Beısenbaev stýdentterdiń suraqtaryna jaýap bere kele, búginde qoǵamda qyzý talqylanyp júrgen saıası reformalar kóptegen jyl boıy qalyptasqan qoǵamnyń suranysynan týyndaǵan aýqymdy reformalar bolyp tabylatynyn atap ótti.
О́z kezeginde Amanat partııasynyń músheleri árbir qazaqstandyqtyń aldynda mańyzdy sheshim qabyldaý mindeti turǵanyn atap ótti. «Qazir elimizdiń barlyq óńiri men eldi mekeninde memleketimizdiń basty qujatyna túzetýler engizýge qatysty aýqymdy aqparattyq-túsindirý jumystary júrgizilýde. Biz almatylyq jastarmen kezdesýde olardyń referendýmǵa degen qyzyǵýshylyǵy joǵary ekenin baıqadyq. Sebebi is-sharalarda kóptegen ózekti taqyryp kóterilip, stýdentter suraqtar qoıyp, óz pikirlerin ashyq bildirdi. El Prezıdenti usynǵan negizgi reformalar olardyń qoǵamdyq-saıası bolashaǵyna degen senimin nyǵaıtýda», dedi depýtat Mádı Ahmetov.
Kezdesý sońynda qatysýshylardyń kópshiligi konstıtýsııalyq túzetýler jobasy boıynsha el turǵyndarynyń jalpyǵa birdeı daýys berýi birligimizdi arttyrady degen ortaq pikirge keldi.
ALMATY
