Jobaǵa elimizdiń ár óńirindegi joǵary synyp oqýshylary, kolledjder men joǵary oqý oryndarynyń stýdentteri qatysa alady.
«Joba aıasynda Táýelsizdik jyldarynda jetistikke qol jetkizgen qazaqstandyqtardyń qatysýymen ár túrli formattaǵy sharalar ótkiziletin bolady. Ár óńirde «Daryn» memlekettik jastar syılyǵy laýreattarynyń qatysýymen netvorkıng jáne tájirıbe almasý, pikirtalas alańdary qurylyp, eberlik synyptary, semınar-trenıngter ótkiziledi», dedi jobany tanystyrǵan joba menedjeri Elvıra Sársenálıeva.
Qyrkúıekte «Táýelsizdik urpaqtary» jobasy aıasynda Nur-Sultan, Shymkent, Almaty qalalarynda «Bolashaq Qazaqstan meniń kózimmen» atty TEDx-konferensııasy ótedi.
«Bul is-sharalarda jastardyń eń belsendi self - made ókilderi memlekettiń damýy men mańyzdy áleýmettik máselelerdi sheshýge qatysty óz kózqarastaryn usynady», dep atap ótti Elvıra Sársenálıeva.
Árbir TEDx-konferensııadan keıin jastardyń bir-birimen tanysýyna, tájirıbe almasýyna, olardyń bastamalaryn talqylaýǵa múmkindik beretin netvorkıng-kezdesýler uıymdastyrylady.
Sondaı-aq «Qazaqstandyq damý qaýymdastyǵy» ZTB Jastar resýrstyq ortalyqtarymen birlesip, «Sheshendik óner», «Qarjylyq saýattylyq», «Taım-menedjment», «Kreatıvti ındýstrııa», «Blogty júrgizý», «Salaýatty ómir salty» taqyryptaryndaǵy offlaın-sheberlik saǵattaryn ótkizbek.
Sonymen qatar joba uıymdastyrýshylary qazaqstandyq talantty jastardyń qatysýymen beıne-podkasttardy ázirleıtin bolady.
«Birinshi kezekte, mundaı jobalar jastardyń ózin-ózi damytýǵa yntalandyrý úshin qajet. «Táýelsizdik urpaqtary» jobasy óte ózekti, búgin biz «Halyq únine qulaq asatyn memleket» tujyrymdamasy boıynsha jumys istep jatqanymyzdyqtan, jas qazaqstandyqtardyń pikiri eldiń damýy úshin óte mańyzdy», dep qorytyndylady sózin Elvıra Sársenálıeva.
«Táýelsizdik urpaqtary» jobasy týraly tolyq aqparatty myna silteme arqyly alýǵa bolady: https://www.instagram.com/p/CdcatbPtblv/?igshid=MDJmNzVkMjY
