Qasym-Jomart Toqaev qyrǵyz delegasııasyna iltıpat bildirip, Sadyr Japarovtyń ekijaqty qatynastardy jańa deńgeıge kóterý jónindegi bastamasyn qoldaıtynyn aıtty.
«Táýelsizdik kezeńinen beri qazaq-qyrǵyz yntymaqtastyǵy barlyq salada qarqyndy damyp keledi. Osy baılanysymyz startegııalyq seriktestik jáne odaqtastyq rýhynda nyǵaıa túsýde. Buǵan qos halyqqa ortaq qundylyqtardyń arqasynda qol jetkizdik», dedi Memleketimizdiń basshysy.
Qazaqstan Prezıdenti shaǵyn formatta ótken kelissózderdiń nátıjesine kóńili tolatynyn atap ótip, Qyrǵyzstan Prezıdentiniń elimizben aradaǵy kópjaqty seriktestikti tereńdetýge degen nıetin joǵary baǵalady.
«Men óz tarapymnan Qazaqstannyń qazaq-qyrǵyz qatynastaryn dostyq, tatý kórshilik jáne shynaıy odaqtastyq rýhynda jan-jaqty nyǵaıtýdyń strategııalyq baǵytyna berik ekenin atap ótkim keledi», dedi Qasym-Jomart Toqaev.
Qasym-Jomart Toqaev memleketaralyq qatynastardyń qarqyndy damyp kele jatqanyn aıta kele, joǵary deńgeıdegi ózara senimdi jáne belsendi saıası dıalogqa, eki el úkimetteriniń úılesimdi jumysyna toqtaldy.
Qasym-Jomart Toqaev qyrǵyz kóshbasshysynyń Qazaqstanǵa jasaǵan memlekettik saparynyń qorytyndysy boıynsha qol jetkizilgen ýaǵdalastyqtardyń tabysty júzege asyrylyp jatqanyn aıtty. Atap aıtqanda, eki el úkimetteri arasyndaǵy baılanystardyń jandanýy, jańǵyrǵan «Qordaı – Aq jol» ótkizý beketiniń ashylýy, turaqty gýmanıtarlyq kómek kórsetý jáne elektr energııasymen almasý jóninde sóz boldy.
Sonymen qatar Memleket basshysy álemdik ekonomıkanyń qubylmaly jaǵdaıyndaǵy yqpaldastyqtyń jańa formalaryna nazar aýdardy.
Qazaqstan Prezıdenti ózara eksporttyq nomenklatýrany keńeıtý, qazaq-qyrǵyz shekarasyndaǵy ótkizý múmkindigin, sonyń ishinde kedendik rásimderge sıfrlyq sheshimderdi engize otyryp jaqsartý arqyly taýar aınalymyn ulǵaıtý máselelerine toqtaldy.
Budan bólek Qasym-Jomart Toqaev oblystar men óńirler arasyndaǵy keń aýqymdy yqpaldastyqty jolǵa qoıýdyń mańyzdy ekenin atap ótti. Osy rette, Prezıdent Qazaqstan men Qyrǵyzstan arasynda birinshi О́ńiraralyq yntymaqtastyq forýmyn tez arada uıymdastyrýdyń mańyzdy ekenin aıtty.
Memleket basshysy ózara tıimdi usynystardy zerdelep jáne perspektıvti jobalardyń tizimin jasaı otyryp, ınvestısııalyq yntymaqtastyqty jandandyrýǵa shaqyrdy. Qyrǵyzstanda gıdroenergetıkalyq nysandy, atap aıtqanda Qambar ata GES-in birlesip salý sonyń biri bolýy múmkin.
Kelissózder barysynda sý dıplomatııasy, aqparattyq tehnologııa salasyndaǵy kooperasııany nyǵaıtý máseleleri qarastyryldy.
Mádenı-gýmanıtarlyq baılanystar baýyrlas eki halyqtyń jaqyndaı túsýine mańyzdy úles qosady. Memleket basshysy Bishkek qalasynyń ortalyǵynda qazaqtyń uly aqyny Abaı Qunanbaıulynyń eskertkishin ashý jónindegi sheshimi úshin Sadyr Japarovqa alǵys bildirdi. Eki el prezıdentteri búgingi kelissózderden keıin osy monýmenttiń saltanatty ashylý rásimine barady. Qasym-Jomart Toqaev óz kezeginde Nur-Sultan qalasynda Manasqa eskertkish qoıylatynyn aıtty.
Qasym-Jomart Toqaev Qazaqstannyń segiz joǵary oqý orny Qyrǵyzstanda ókildikterin ashýǵa nıet bildirip otyrǵanyn atap ótip, qyrǵyz stýdentteri úshin bólinetin kvotalardyń sany 50-ge deıin kóbeıgenin jetkizdi.
Qyrǵyzstan Prezıdenti óz kezeginde ekijaqty qatynastardyń qarqyndy damyp kele jatqanyn aıtty.
«Memleketterimiz arasynda eshqandaı saıası qaıshylyq joq. Eń bastysy – osy. Qyrǵyzstan men Qazaqstan kúsh biriktire otyryp, ekijaqty baılanystardy odan ári nyǵaıtýdy, sondaı-aq aımaqtyq turaqtylyq pen qaýipsizdikti nyǵaıtý úshin óńiraralyq jáne halyqaralyq qurylymdar aıasyndaǵy konstrýktıvti yqpaldastyqty qamtamasyz etetini jóninde aıqyn túsinik bar», dedi Qyrǵyzstan Prezıdenti.
Kezdesý aıasynda Qazaqstan men Qyrǵyzstan kóshbasshylaryna «Qarasý» jáne «Aq-Tilek» ótkizý beketteriniń aýmaǵynda «Alataý» ındýstrııaldy saýda-logıstıkalyq kesheni qurylysynyń bastalǵany týraly beınesıýjet kórsetildi. Bul nysannyń salynýy aradaǵy deldaldardyń sanyn azaıtýǵa, tutynýshylar úshin ónimniń ózindik qunyn tómendetýge jáne jetkizý jyldamdyǵyn arttyrýǵa múmkindik beredi.
Kelissózder qorytyndysy boıynsha Qasym-Jomart Toqaev pen Sadyr Japarov ekijaqty yntymaqtastyqty meılinshe jańa deńgeıge kóterýge, seriktestikti odan ári jandandyrýǵa jáne halyqaralyq arenadaǵy is-qımyldardy úılestirýge baǵyttalǵan birlesken málimdemege qol qoıdy.
Aıana Toǵanbek
