Ekonomıka • 29 Mamyr, 2022

Qorǵa 523 mlrd teńge aýdardy

201 ret

kórsetildi

3 mın

oqý úshin

Bıylǵy 1 mamyrdaǵy jaǵdaı boıynsha Biryńǵaı jınaqtaýshy zeınetaqy qory salymshylarynyń shotynda 13 trln teńgedeı zeınetaqy jınaǵy qalyptasqan. Týra bir jyl ishinde atalǵan qarajat 356,9 mlrd teńgege nemese 2,8 paıyzǵa ulǵaıǵan.

Farhat QAIRATULY

Kollajdy jasaǵan Záýresh SMAǴUL, «EQ»

Zeınetaqy jınaqtarynyń negizgi bóligi mindetti zeınetaqy jarnalary esebinen quralǵan – 12,6 trln teńge. Sońǵy 12 aıdaǵy ósim 2,4 paıyzǵa teń. Mindetti kásiptik zeınetaqy jarnalary boıynsha zeınetaqy jınaqtarynda 377,4 mlrd teńge (ósim 18,2 paıyz) qalyptasyp otyr. Erikti zeınetaqy jarnalary boıynsha zeınetaqy jınaqtarynyń jalpy kólemi shamamen 1,8 mlrd teńgege teń.

Qordyń habarlaýynsha, kiris aǵyndary, ıaǵnı jarnalar bıyl kóbeıgen. 2022 jyldyń qańtar-sáýirinde salymshylardyń shotyna shamamen 523,5 mlrd teńge kóleminde zeınetaqy jarnasy túsipti. Bul 2021 jyldyń sáıkes kezeńindegi kórsetkishten 27 paıyzǵa joǵary. Kórsetkish 110,7 mlrd teńgege asyp túsken. О́sim jarnalardyń barlyq túri boıynsha qalyptasyp otyr. Jarnalardyń jalpy kóleminiń 95,1 paıyzy mindetti zeınetaqy jarnalary túsimderin quraıdy – 497,7 mlrd teńge (sońǵy 12 aıdaǵy ósim 26 paıyz), Mindetti kásiptik zeınetaqy jarnalary boıynsha 25,4 mlrd teńge (ósim 37 paıyz) tússe, erikti zeınetaqy jarnalary boıynsha 400 mln teńge (ósim 85 paıyz) aýdarylǵan.

Salymshylardyń jarnasynan basqa, zeınetaqy jınaqtarynyń ósimi taza ınvestısııalyq tabys arqyly qamtamasyz etiletini belgili. 2022 jyldyń 1 qańtary men 1 mamyry aralyǵynda bul kórsetkish 128,7 mlrd teńgege teń boldy.

«2022 jyldyń 1 mamyryna qaraı, Biryńǵaı jınaqtaýshy zeınetaqy qoryndaǵy jeke zeınetaqy shottarynyń sany 11,7 mln-ǵa jetti. Shottardyń eń kóp úlesi mindetti zeınetaqy jarnalary esebinen ashyldy – 10 870 075. Mindetti kásiptik zeınetaqy jarnalarynan qalyptasqan shottar bir jylda 8,4 paıyzǵa ulǵaıyp, 565 802-ge jetti. Al erikti zeınetaqy jarnalary esebinen qalyptasqan shottar sany 60 paıyzǵa kóbeıip, 69 188-di qurady», dep habarlady zeınetaqy qory.

Jyl basynan beri BJZQ óz salymshylaryna 921,4 mlrd teńge tólegenin atap ótken jón. Onyń basym bóligin turǵyn úı jaǵdaıyn jaqsartý jáne emdeý maqsattaryna arnalǵan birjolǵy zeınetaqy tólemderi quraıdy – 831,7 mlrd teńge. Jasyna baılanysty tólemder – 37 mlrd teńgeni, muragerlik boıynsha tólemder – 23,4 mlrd teńgeni, Qazaqstan sheginen tys turaqty turýǵa ketýge baılanysty tólemder – 16,9 mlrd teńgeni, saqtandyrý uıymdaryna aýdarylǵan soma – 9,7 mlrd teńgeni, jerleýge arnalǵan tólemder – 1,9 mlrd teńgeni jáne múgedektik boıynsha tólemder 0,8 mlrd teńgeni quraǵan.

BJZQ-dan keste boıynsha aı saıynǵy ortasha tólem (zeınet jasyna tolýyna baılanysty) 29 360 teńge bolsa, al aı saıynǵy eń joǵary tólem 707 326 teńgege teń boldy.