Klýbtar arasyndaǵy eń iri týrnır sanalatyn Chempıondar lıgasynyń bıylǵy fınalynda tórt jyl buryn «qos qulaqty» kýbokty sarapqa salǵan Ispanııanyń «Realy» men Anglııanyń «Lıverpýli» qaıta jolyqty. Fransııa astanasy – Parıjdegi 80 myń jankúıer syıatyn «Stad de Frans» stadıonynda ótken bıylǵy fınal básekesinde bul joly da madrıdtik ujymnyń mereıi ústem boldy – 1:0. Matchtaǵy jalǵyz ári jeńisti goldy oıynnyń 59-mınýtynda Vınısıýs Jýnıor soqty.
Sóıtip ıspanııalyqtar ÝEFA tarıhynda 66 márte uıymdastyrylǵan Chempıondar lıgasynda 14 márte top jaryp, óz rekordtaryn jańartty. Al «Lıverpýl» óz tarıhynda alty ret jeńimpaz atanǵan. Bul da tamasha kórsetkish. Match barysynda anglııalyq klýb qaqpaǵa soqqy jasaý boıynsha 23 (9) – 4 (1) esebimen alda bolsa da, Kýrtýa 9 seıv jasap, fınaldyń qaharmanyna aınaldy.
