Kezdesý 4:1 esebimen ulttyq quramanyń paıdasyna aıaqtaldy.
Alǵashqy taımda qorǵaýshy Aleksandr Marochkın qos gol soqty. Oıynnyń ekinshi bóligi bastalǵan sátte Maksım Samorodov kózge tústi. 51-mınýtta jastardyń qorǵaýshysy Saǵı Sovet esep aıyrmasyn qysqartty. Match sońyna qaraı Alekseı Shetkın penaltıden gol soqty.
Oıynnan soń ulttyq quramanyń bas bapkeri Magomed Adıev komanda daıyndyǵynyń negizgi mindetterine toqtaldy.
«Oıynǵa úsh tapsyrma qoıyldy: keıbir oıyn úlgileri men oıynshylardyń quramyn baıqaý, aldaǵy oıyndarda qoldanylatyn jańa oıyn júıesin kórý jáne úsh kúnge sozylǵan eki rettik jattyǵýdan soń fýtbolshylardyń fızıkalyq jaǵdaıyn saralaý boldy. Barlyǵyn kórip, taldap shyqtyq dep oılaımyn. Endi Ulttar lıgasynyń oıyndaryna daıyndalamyz. Jastar quramasymen ótken joldastyq kezdesýden jattyqtyrýshylar shtaby mol maǵlumat aldy dep sanaımyn», dedi Adıev.
Qazaqstan jastar quramasynyń U-21 aǵa jattyqtyrýshysy Qaırat Nurdáýletov te kezdesý týraly oıyn ortaǵa saldy.
«Joldastyq oıynǵa qoıǵan óz maqsatymyz boldy. Ulttyq qurama ózderine jeke maqsattar qoıdy. Eń aldymen fýtbolshylardy 4 jáne 10 maýsym kúnderi ótetin oıyndarǵa daıyndaý qajet. Fızıkalyq jaǵynan joldastyq oıynnyń mańyzy zor boldy. Eki ortalyq qorǵaýshyny oınatyp, jańa oıyn júıesin synap kórdik. Alǵa qoıylǵan mindetter tolyq oryndaldy dep oılaımyn. Jattyqtyrýshylar shtabynyń komandanyń oıyny men fýtbolshylardyń jyldamdyǵyna kóńili tolady. Barlyq málimetterdi aldyq. Endi osy oıyndy taldap, ári qaraı daıyndalamyz. Usynymyzdy qabyldap, kezdesýdi uıymdastyrǵan ulttyq quramanyń jattyqtyrýshylar shtabyna alǵys aıtamyn. Olar úshin de oıyn paıdaly bolady dep úmittenemin», dedi Qaırat Nurdáýletov.
