Dóńgelek ústelge QR Parlamenti Senatynyń depýtattary Baqytjan Jumaǵulov, Dınar Núketaeva, Sultanbek Makejanov, ǵalym, qoǵam qaıratkeri Rahman Alshanov, Almaty qalalyq máslıhatynyń hatshysy Stanıslav Kankýrov, Sátbaev ýnıversıtetiniń oqytýshy-professorlar quramy men JOO stýdentteri qatysty.
Elimizdegi búkilhalyqtyq referendýmǵa sanaýly kúnder qaldy. Tyń serpinmen baǵyt alǵan jańa Qazaqstandy qurý jolynda Konstıtýsııalyq ózgeristerdiń máni men mazmunyn árbir azamat túsiný qajet. Referendým – memleket úshin asa mańyzdy saıası oqıǵa. Sáıkesinshe elimizdiń barlyq aımaqtarynda túsindirý jumystary belsendi júrip jatyr. Daıyndyq naýqany jaqsy deńgeıde dep aıtýǵa bolady. Endigi kezekte ekinshi respýblıkany qalyptastyrý prosesine árqaısymyz atsalysyp, óz tańdaýymyzdy jasaýymyz kerek. Sebebi Qazaqstannyń bolashaǵy bárimizge ortaq.
«Halyqqa bılik tarmaqtarynyń ózara qarym-qatynastarynyń ońtaıly tetigin jasaý, Parlamenttiń róli men mártebesin qaıta qaraý, halyqtyń el basqarý isine aralasýy, adam quqyqtaryn qorǵaý jáne zańnyń ústemdigi syndy bloktardyń árqaısysy boıynsha túsindirý jumystary úzdiksiz júrip jatyr», dedi Dınar Núketaeva.
Odan keıin sóz alǵan Senator Baqytjan Jumaǵulov ta aldaǵy tarıhı kúndi ádiletti, zań ústemdik quratyn Memleket qurýymyzdyń alǵy sharty dep qabyldaýymyz kerek degen pikirin bildirdi.
«Reformalar maqsaty – ádilettilik. Ádilettilik bar jerde bılikke degen senim de, jaqsy ómir de bolady. Sol úshin árbir azamat aldaǵy saıası naýqanǵa óz úlesin qosýy kerek. Osylaısha biz oń ózgeristerge senimdi bola alamyz», dedi Baqytjan Jumaǵulov.
Talqylaý barysynda baıqaǵanymyz, halyq aldaǵy saıası reformalardy jaqsy túsinip, tolyǵymen qoldap otyrdy. Jastar ózderiniń bolashaǵyn ádiletti Qazaqstanmen baılanystyratyndyǵy qýantady.
Jıynda reformalardyń maqsaty, halyq belsendiliginiń rólimen qatar, túsindirý jumystaryndaǵy BAQ-tyń mańyzy da atalyp ótti.
Baıan Muratbekqyzy
ALMATY
