Senat Spıkeriniń sapary Qoja Ahmet Iаsaýı kesenesine zııarat etýmen bastaldy. Ol jerde senatorlar saıası qýǵyn-súrgin jáne asharshylyq qurbandarynyń rýhyna taǵzym etip, duǵa jasady. Al óńirdiń zııaly qaýymymen kezdesýde Memleket basshysynyń bastamasymen elimizde júrgizilip jatqan saıası reformalar talqylandy. Jıynǵa sondaı-aq senatorlar Álı Bektaev, Aıgúl Qapbarova, Álimjan Qurtaev qatysty. Tarıhı sanany jańǵyrtý máselesine nazar aýdarylǵan jıynda Senat tóraǵasy sońǵy jyldarda belsendi júrgizilip kele jatqan asharshylyq taqyrybyn zertteý jumystarynyń mańyzdy ekenin, osy bastamany respýblıkalyq jáne óńirlik deńgeıde jalǵastyrý kerek ekendigin aıtty. «Asharshylyq taqyrybyna arnalǵan jumystardy ári qaraı jalǵastyrýdyń mańyzy zor. Bul birinshi kezekte, tarıhı sanamyzdy jańǵyrtý úshin qajet. Al tarıhı sanany jańǵyrtý degenimiz – Táýelsizdikti nyǵaıtý, eldikti eńseli etý jáne ulttyq qundylyqtardy dáripteý jolyndaǵy negizgi qadamdardyń biri», dedi Máýlen Áshimbaev.
Sonymen qatar Senat Tóraǵasy el Prezıdentiniń bastamasymen qolǵa alynǵan saıası reformalarǵa toqtaldy. Konstıtýsııaǵa engizý úshin usynylǵan túzetýler men aldaǵy referendým elimizdiń saıası júıesin ǵana emes, basqa da salalardy damytýǵa berik negiz qalaıtynyn atap ótti. «Konstıtýsııalyq reforma bılik monopolııasyn boldyrmaýǵa jáne saıası básekeni damytýǵa jol ashady. Bul bastamalardyń bári Qazaqstandy demokratııalyq, quqyqtyq, ádiletti jáne áleýmettik memleket retinde nyǵaıtýǵa baǵyttalǵan. Osy joldaǵy jumystar Konstıtýsııaǵa ózgerister engizýmen toqtamaıtyny belgili. Aldaǵy ýaqytta da saıası júıemizdi reformalaý isi jalǵasa beredi», dedi Senat Tóraǵasy.
Al Qoja Ahmet Iаsaýı atyndaǵy Halyqaralyq qazaq-túrik ýnıversıtetiniń oqytýshy-professorlar quramymen jáne stýdentterimen kezdesýde Máýlen Áshimbaev konstıtýsııalyq reformanyń negizgi baǵyttary týraly aıtyp, jastardyń suraqtaryna jaýap berdi. Kezdesýde Senat Tóraǵasy HHI ǵasyr bilim men ǵylymnyń dáýiri ekenin, osy oraıda jastarǵa qoıylatyn talap ta ózgeretinin aıtyp ótti. Jastardy únemi bilimin jetildirip otyrýǵa shaqyrdy. Sondaı-aq adamnyń boıyndaǵy synı kózqaras, oılaý júıesin damytý syndy qasıetterdiń mańyzyna toqtalyp, óz keńesin berdi. «Qazirgi tańda bilim alý ómirlik proseske aınaldy. Búginde jaı ǵana saýatty bolý jetkiliksiz. Ýnıversıtet qabyrǵasynda bakalavr nemese magıstr dárejesin ıelendim dep te toqmeıilsýge bolmaıdy. Árdaıym izdeniste bolý qajet. О́zińdi úzdiksiz jetildirip otyrý – jetistiktiń negizi», dedi Máýlen Áshimbaev.
Kentaý transformator zaýytynyń ujymymen jáne óńirdegi bir top áleýmettik kásipkermen kezdesýde Senat Tóraǵasy saıası reformalardyń mańyzyna nazar aýdardy. Aımaqtaǵy ózekti máseleler, atalǵan salaǵa qatysty túıtkilder de jan-jaqty talqylandy. Máýlen Áshimbaev aıtylǵan pikirler men usynystar tıisti memlekettik organdar tarapynan pysyqtalyp, Parlamenttiń zań shyǵarý jumysynda eskeriletinin jetkizdi.
Túrkistan oblysy
