• 19 Sáýir, 2014

«Erjúrek» dırektor parany qarjy polıseıiniń ózine usynǵan

223 ret

kórsetildi

1 mın

oqý úshin

Egemen Qazaqstan

Áýlıekól aýdany ákimdigine qarasty «Mereı» memlekettik kommýnaldyq kásipornynyń dırektory Ábildınov degen azamat ekonomıkalyq qylmysqa jáne sybaılas jemqorlyqqa qarsy kúres departamentiniń qyzmetkerlerine «aýyzbastyryq» berip, tyǵyryqtan shyǵýdy oılady. Departamentke buryn túsken shaǵym boıynsha osy kásiporyn dırektorynyń óz laýazymyn asyra paıdalanǵany jónindegi faktiniń aq-qarasyn tekserýge barǵan qarjy polıseıine dırektor 185 myń teńge para bermekshi boldy. Dırektor tekserýdiń sońyn kútpeı, istiń oń qorytyndylanýyna qol jetkizý úshin qarjy polıseıine aqshany birneshe ret usynady. Biraq ol para almaıtynyn, al para bergeni úshin dırektordyń qylmystyq jaýapkershilik arqalaıtynyn eskertedi. Alaıda dırektor bul eskertýdi tyńdamaıdy, kásiporynnyń bas býhgalterine kassadan 185 myń teńge aqshany óndiris bóliminiń meńgerýshisi azamat S.-nyń atyna jazyp berýdi buıyrady. Kassadan alynǵan bul aqsha Qarjy polısııasynyń qyzmetkerine para retinde beriledi. Paraqordyń bul áreketi departamenttiń Áýlıekól aýdanyndaǵy óńiraralyq bólimi ǵımaratynda aqsha berý kezinde áshkere boldy. Ábildınovtyń isi boıynsha qylmystyq is qozǵalyp, ol sotqa jiberildi. Názıra JÁRIMBETOVA, «Egemen Qazaqstan». Qostanaı oblysy, Áýlıekól aýdany.