Pasha meıramymen quttyqtady

Qazaqstan Respýblıkasynyń Prezıdenti N.Á.Nazarbaev Pasha meıramymen quttyqtady, dep habarlady Qazaqstan Prezıdentiniń baspasóz qyzmeti. Qymbatty otandastar! Búkil Jer sharyndaǵy mıllıondaǵan adam erekshe sezimmen kútetin jarqyn mereke – Pashamen shyn júrekten quttyqtaımyn! Bul – hrıstıandar úshin eń qasterli kún jáne bıyl ony pravoslavıelikter men katolıkterdiń bir mezgilde merekeleýinde sımvoldyq mán bar, delingen Prezıdenttiń quttyqtaýynda. Memleket basshysy, sondaı-aq, Pashanyń jańarý, shattyq jáne úmit lebin ala keletinin, onyń izgilik bastaýynyń, aqıqat pen ádilettiń saltanatyn pash etip, ıgi isterge shaqyratynyn atap kórsetedi. Bul kúnderi barlyq adamǵa birlik, senim, ózara qurmet jáne suhbattasýǵa beıildilik sııaqty qundylyqtardyń ómirsheń máni aıryqsha aıqyn seziledi. Gýmanıstik murattar ortaq rýhanı keńistik qalyptastyra otyryp, meılinshe qundy bola túsedi, delingen quttyqtaýda. Qazaqstan – qoǵamnyń nyǵaıýyna, eldiń damýy men órkendeýine ólsheýsiz úles qosatyn barlyq din úshin qushaǵy ashyq el. Bizdiń memleketimiz barlyq konfessııa ókilderine jaıly ahýal qalyptastyryp otyr. Biz bárimiz birge, sonyń ishinde pravoslavıelikter men katolıkterdiń de belsene qatysýymen tatýlyq pen kelisim arqyly qýatty Qazaqstandy qalyptastyrýdamyz, deıdi Prezıdent óziniń quttyqtaýynda. Pasha – adamdardy jaqyndastyra túsetin otbasylyq mereke jáne bul tatý-tátti turatyn, ortaq bolashaǵyna senimmen qaraıtyn alyp shańyraq ispetti bizdiń el úshin erekshe mańyzdy, deı kelip, Memleket basshysy quttyqtaýyn mynadaı sózdermen aıaqtaıdy: «Meniń quttyqtaýymdy jáne baqyt, ıgilik, jan jylýyn tilegen lebizimdi qabyl alyńyzdar! Barsha qazaqstandyqtarǵa ózara túsinistik pen kelisim tileımin!».