Áskerı sherýge daıyndyq belgilengen tártippen oıdaǵydaı júrýde

7 mamyr – Otan qorǵaýshylar kúninde elordada dúrkirep ótetin saltanatty áskerı sherýge daıyndyq jumystary Astana irgesindegi arnaıy dalalyq lagerde ótýde. Ondaǵy sardarlar men sarbazdardyń tynys-tirshiligi men ázirlikterin kórsetý úshin Qorǵanys mınıstrliginiń ókilderi jýrnalısterdi júrip jatqan jumystarmen tanystyrdy. Lagerde tigilgen shatyr­lardyń jalpy sany 100-di qurasa, onyń 60-y jeke quram sarbazdaryna tıesili. Al qalǵan 40 shatyr ashana, dárigerlik pýnkt, qoıma sekildi oryndarǵa berilgen. Sherýge daıyndalatyn sardarlar men sarbazdardyń bir mezgil oılaryn sergitý maqsatynda lagerde mádenı sharalar ótkizip turý da nazardan tys qalmaǵan. Osy turǵyda oǵan arnaıy oryn da belgilenipti. «Bıylǵy sherýdiń ereksheligi áskerı tehnıkalarǵa basa nazar aýdarylatyndyǵynda der edik. Mehanıkalandyrylǵan tehnıkanyń sany kóbirek bolmaq. Elimiz áskeriniń kúsh-qýatyn, tehnıkalyq jaraqtandyrylý áleýetin kórsetý sherýdegi basty maqsatymyz. Osyǵan baılanysty elimizdiń óńirlerindegi óndiris oshaqtarynda jasalatyn otandyq áskerı tehnıkany osy sherýde kórsetemiz. Oǵan biz daıynbyz», – deıdi lagerlik jıynnyń shtab bastyǵy, polkovnık Qasymseıit О́mirbekov. Munan keıin BAQ ókilderi merekelik saltanatty sherýde sap túzep ótetin jeke quramalardyń daıyndyǵyn da tamashalady. Arnaıy áýenmen alǵa qaryshtap qadam basqan sarbazdar ózderine berilgen tapsyrmany múltiksiz oryndaýda. Bulardyń arasynda 80-nen astam áskerde qyzmet etetin názik jandardan turatyn qyzdar toby da bar. Bul rette erlermen qosa olardyń daıyndyqtarynyń da joǵary deńgeıde ekendikterin áskerı sherýge daıyndyq lagerlik jıynynyń bastyǵy, polkovnık Qaıdar Qaraqulov erekshe rızashylyqpen jetkizdi. Sonymen birge ol áskerılerdiń sherýge degen yntalarynyń da joǵary ekendigin atap kórsetti. Ábdirahman QYDYRBEK, «Egemen Qazaqstan». ASTANA.