Qoǵam • 01 Maýsym, 2022

Gazǵa qosylý jeńildeıdi

Gazǵa qosylý úshin tehnıkalyq sharttardy alý jyldam ári qoljetimdi bolady. Tabıǵı monopolııalardy retteý komıteti osyǵan sendirip otyr.

Farhat QAIRATULY

Búginde respýblıkany gazdandyrý mańyzdy másele ekeni anyq. Ásirese Nur-Sultan qalasyn, Qaraǵandy, Aqmola oblystaryn jáne soltústik óńirlerdi gazdandyrýǵa erekshe mán berilgen. Sondyqtan tutynýshylardy gazǵa qosý prosesin jedeldetý maqsatynda tehnıkalyq sharttardy alýǵa arnalǵan qujattar sanyn qysqartý júrgizilýde.

Buǵan deıin tutynýshy ortalyqtandyrylǵan gazben jabdyqtaýǵa qosylý úshin 8 qujat jınaýy qajet edi. Álbette, bul qosylý prosesin aıtarlyqtaı keshiktirdi. Endi tutynýshyǵa tek 4 qujat qana qajet. Atap aıtqanda, birinshi qujat – nysan ıesiniń jeke basyn kýálandyratyn qujattyń kóshirmesi (jeke tulǵalar úshin), kýáliktiń kóshirmesi nemese qyzmettiń bastalǵany týraly habarlamanyń kóshirmesi (jeke kásipker úshin), memlekettik tirkeý (qaıta tirkeý) týraly anyqtama (zańdy tulǵalar úshin). Ekinshi qujat – jer ýchaskesine tirkelgen quqyqtar (aýyrtpalyqtar) týraly málimetter ne jer ýchaskesine quqyq belgileıtin qujattar. Úshinshi qujat – nysannyń ornalasý syzbasy. Tórtinshi qujat – kópqabatty úılerdi gazdandyrý kezinde shıki gazdy tutynýǵa, tamaq daıyndaýǵa, jylytýǵa, jeldetýge, aýa baptaýǵa, ystyq sýmen jabdyqtaýǵa arnalǵan gıdravlıkalyq esepteýler (zańdy tulǵalar úshin).

Bul úshin Tabıǵı monopolııalardy retteý komıteti memlekettik apparattyń qyzmetin bıýrokratııasyzdandyrý boıynsha sharalardy júzege asyrýda. Sondaı-aq elimizdiń gazdandyrylǵan óńirleriniń turǵyndaryn gazǵa qosýdy yntalandyrý maqsatynda tıisti quqyqtyq aktilerge ózgerister engizý boıynsha jumystar júrgizýde. Onyń ishinde tehnıkalyq sharttardy alý rásimin ońaılatýda.

Joǵaryda atalǵan ózgerister gazǵa qosylý barysynda tehnıkalyq sharttar alǵan kezde qujattar sanyn qysqartýǵa múmkindik beredi. Bul shara adamdarǵa jeńildetilgen tártippen tehnıkalyq sharttar alýǵa jáne aǵymdaǵy maýsym barysynda ýaqyt pen aqshany únemdeı otyryp, gazǵa jyldam qosylýǵa jol ashady. Osylaısha, halyqtyń gazǵa tez kóshýine yqpal etedi.

Búgingi tańda buıryq jobasyn jeke kásipkerlik sýbektileriniń akkredıttelgen birlestikterimen jáne múddeli memlekettik organdarmen kelisý júrgizilýde. Sondaı-aq halyqty gazdandyrý turǵyndardyń jaılylyǵyna ǵana emes, qorshaǵan ortaǵa tikeleı qatysy bar ekenin atap ótken jón.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz