Búgin, 19 sáýir kúni fýtboldan Qazaqstan birinshiligi premer-lıgasy jetinshi týrynyń oıyndary oınaldy. Onda 26 gol soǵyldy, 5 oıynshy alańnan qýyldy. Bul týraly egemen.kz tilshisi habarlady.
Týrdyń basty matchy Pavlodarda jergilikti «Ertis» pen «Astana» arasynda ótti. Osy kezdesýde chempıonat bastalǵaly beri qaqpasyn «qurǵaq» ustap kele jatqan meımandarǵa birinshi gol salyndy. Ony 16-mınýtta aıyp alańyna jetken dopty darbazaǵa dál baǵyttaı bilgen Mıodrag Djýdovıch saldy. Osydan keıin eki mınýt ótkende, Tańat Nóserbaev esepti teńestirdi. Biraq bul tepe-teńdik uzaqqa barǵan joq, 27-mınýtta Ulyqbek Bakaev alań ıelerin taǵy alǵa shyǵardy. Al taım sońynda bul shabýylshy penaltıden gol túsirip, komandanyń basymdyǵyn eki dopqa jetkizdi. Sol sátte qonaqtar sapyndaǵy Atanas Kýrdov taǵy bir jaýap dop qaıtaryp, esepti 3:2-ge kidirtti.
Ekinshi taımda joǵarydaǵy Atanastyń dáýreni júrdi. Ol aldymen 55-mınýtta esepti teńestirip berdi. Sosyn 76-mınýtta taǵy bir goldyń avtory atanyp, het-trıkke qol jetkizdi. Osy oıynda eki oıynshy alańnan qýyldy. Atap aıtqanda, 45-mınýtta meımandardan Anıchıch osyndaı jaza alsa, 68-mınýtta Baqaev sonyń artynan ketti.
Semeıde «Spartak» pen Taldyqorǵannyń «Jetisý» komandalary arasynda kúshti anyqtalmady. Degenmen, 7-mınýtta Beıbit Tátishevtiń arqasynda alǵa shyqqan qonaqtar 69-mınýtqa deıin alda turdy. Osy artyqshylyqty Savo Kovachevıch buzyp jiberdi.
Qostanaıda jergilikti «Tobyl» men Almatynyń «Qaıraty» arasyndaǵy oıynda da qarsylastar bir-birin ala almady. Match qonaqtardyń basymdylyǵymen bastaldy. Olar 27-mınýtta Momodý Sısseıdiń, 43-mınýtta Iosıp Knejevıchtiń soqqan goldary arqasynda 2:0 esebimen alda turdy. Biraq ekinshi taımda 4 mınýttyń ishinde alań ıeleri tarazy basyn teńestirip úlgerdi. Olardy Anatolıı Bogdanov pen Ognen Krasıch 69 jáne 73-mınýttarda túsirdi.
Al taǵy bir teń oıyn tirkelgen Tarazda esep budan da qomaqty shyqty. Mundaǵy «Taraz» ben «Atyraý» arasyndaǵy oıyn 3:3 esebimen teń tarqady. Oıyn barysynda meımandar ylǵı alǵa shyǵýmen, alań ıeleri teńestirýmen boldy. Atap aıtqanda, atyraýlyqtar sapyndaǵy Stefan Essame (30, 88-mınýttar), Savıo Nskereko (60-mınýt) salǵan goldarǵa alań ıelerinen Tımýr Dosmaǵambetov (56-mınýt), Murat Tileshev (68-mınýt) jáne Iovan Golıch (90-mınýt) artynsha jaýap qaıtaryp otyrdy. Bul oıynda úsh oıynshy (Golıch, 90; Ýbbınk, 90+3 – «Taraz», Karpovıch , 90,3– «Atyraý») alańnan qýyldy. Olardyń bári oıyn bitip jatqanda osyndaı jaza aldy.
Budan keıingi eki oıynda da alań ıeleriniń mereıleri ústem boldy. Solardyń birinshisinde – Qaraǵandynyń «Shahteri» óz alańynda Shymkenttiń «Ordabasy» komandasyn 3:1 esebimen tize búktirdi. Alǵashqy úsh goldy kenshiler saldy (Maqsat Baıjanov, 7; Shavkat Salomov, 20; Gedımıntas Vıchıýs, 46). Al qonaqtar bir doptyń qarymtasyn 90-mınýtta Mardan Tórebektiń kúshimen qaıtardy.
Aqtóbedegi oıyn da alań ıeleriniń basymdyǵymen ótti. Jergilikti komanda, kenshiler tárizdi, meımandar – Qyzylordanyń «Qaısar» jasaǵynyń fýtbolshylaryna qaraǵanda, anaǵurlym shıraq oınady. Sonyń nátıjesinde olar úsh dop aıyrymymen jeńiske jetti. Oıyndaǵy birinshi gol 45-mınýtta Aleksandr Geınrıhtiń sheberligimen salyndy. Kelesi goldy Danılo Neko 49-mınýtta túsirdi. Al sońǵy goldy 90-mınýtta Aleksandr Mıroshnıchenko óz esebine jazdy.
Damır Qojamqul.
Derekkóz: egemen.kz.
Foto: egemen.kz.
