Qazaqstan táýelsizdigin álem jurtshylyǵyna jarııalaǵannan keıin onyń qalyptasýy men damýy bas aıaǵy otyz jyldyń ishinde taram-taram joldardan, alynbaıtyndaı kóringen asýlardan ótti. Bul memlekettiliktiń taǵy da bir jańǵyrǵan qadamy edi.
Álemdik geraldıka tájirıbesindegi halyq úshin eń qasterlisi – Memlekettik geraldıka. Táýelsizdik tarıhynyń jarqyn betteriniń biri, Qazaqstannyń eltańbasyn, týyn erejelerge saı qurastyrý, sıpattaý, Gımnin bekitý jáne halyqqa usyný saltanaty bolatyn.
Táýelsiz Qazaqstannyń tarıhynda elimizdiń memlekettik Gımni eki ret – 1992 jáne 2006 jyldary bekitildi. Memlekettik Gımnge Jumeken Nájimedenovtiń sózine jazylǵan Shámshi Qaldaıaqovtyń «Meniń Qazaqstanym» áni tańdaldy. Qazaqstan Parlamenti 2006 jyly 6 qańtarda palatalardyń birlesken otyrysynda «Memlekettik rámizder týraly» Jarlyqqa tıisti túzetý engizip, elimizdiń jańa memlekettik Gımnin bekitti. Tarıhı kezeńde Gımnniń mátinine Tuńǵysh Prezıdent Nursultan Nazarbaev túzetýler usynyp, bekitilgen bolatyn.
Rasynda, táýelsizdik bizge mol múmkindikterdi ashqany talas týdyrmaıtyny aqıqat. Búginde 4 maýsym memlekettik rámizderimizdi ulyqtaıtyn kún retinde bekidi. Egemendiktiń irgetasynyń beriktiginiń belgisi – táýelsiz Qazaqstannyń Memlekettik rámizderi dúnıege keldi. Memlekettik tý, Memlekettik Eltańba, Memlekettik Gımn eldiktiń boıtumaryna aınaldy.
Belgili sýretshi Sháken Nııazbekov usynǵan kók tý baıqaýda jeńip shyǵyp, búgingi kúni kókte jelbirep, maqtanyshymyzǵa aınaldy. Otbasy men shańyraqtyń berekesin, halyqtyń darqan kóńili men beıbitsúıgishtik rýhyn, erik-jigerin asqaqtatqan, tanymal sáýletshiler Jandarbek Málibekov pen Shot-Aman Ýálıhanovtyń usynǵan Qazaqstannyń basty sımvoly – Memlekettik eltańba eldigimizdiń kórinisi.
Zamanaýı jaǵdaıdaǵy ekonomıka qoǵam belsendiligin kóterý jáne halyqtyń ómir súrý sapasyn arttyrýǵa negizdelgeni áý bastan aıan. О́sip-jetilgen jastardyń jańa býynyna artylar úmittiń mol ekendigi de ras. Intellektýaldy ult bolmysyn qalyptastyrý maqsatynda búkil resýrstardy jumyldyrý kózdelip jatqany da barshaǵa málim. Qazirgi jahandyq ózgerister dáýirinde halyqaralyq qatynastardyń beıbereket júıesi aıasynda ózara qarym-qatynastarǵa degen senimniń toqyraýǵa ushyraýy óte ókinishti. Álemdik quldyraý men daǵdarys jaǵdaıynda Qazaqstan – halyqtyń amanatyna qııanat jasaýǵa bolmaıtyndyǵyn memlekettik deńgeıde ashyq málimdegen biregeı memleket ekenin qaı kezde de maqtanyshpen aıta alamyz. Qazaqstandyq kemeldený – turǵyndar ál-aýqatyn arttyrý, áleýmettik Strategııanyń iske asýy. Jańa álemdegi Jańa Qazaqstannyń basty baǵyty – jasampazdyqpen asyl murattarǵa jetý. Sol jolda kók týymyz bıikterde jelbireı bersin! Rámizder kúni qutty bolsyn!
Qundyzaı ERIMBETOVA,
Memleket tarıhy ınstıtýtynyń jetekshi ǵylymı qyzmetkeri,
tarıh ǵylymdarynyń kandıdaty
