Segiz qyrly, bir syrly azamat

Ekinshi dúnıejúzilik soǵys aıaqtalyp, búkil elde halyq sharýashylyǵyn qalpyna keltirý isi júrip jatqan shaqta Ábdiǵappar qarııanyń úıinde qýanysh oty lap etti. Dúnıege ul kelip, elge syıly aqsaqaldy aýyl bolyp quttyqtap jatty. Balaǵa qarııa­nyń kóńilinde kópten júrgen nyspy – Satybaldy esimi beriledi. Ol ýaqyt ári tartsań beri, beri tartsań ári jetpeıtin qıyn kezeń bolatyn. Sonda da Ábdiǵappar qarııa bala-shaǵasyn taryqtyrmaýǵa tyrys­ty. Sapaly bilim berdi. Ataqty oıshyl Ábý Nasyr ál-Farabı: «Adamǵa eń birinshi bilim emes, tárbıe kerek. Tárbıesiz berilgen bilim – adamzattyń qas jaýy, ol keleshekte onyń ómirine qaýip ákeledi», degen eken. Áke tárbıesin myqtap sińirgen Satybaldy qurylysshylardy daıarlaıtyn oqý ornyna túsedi. «Injener-qurylysshy, joldar men kópirlerdi salý jáne paıdalanýǵa berý jónindegi ınjener» mamandyǵyn alyp shyqqan jas maman kóp oılanbastan eńbek maıdanyna súńgip ketedi. Birneshe jol qurylysynyń basy-qasynan tabylady. Din jolymen qarasańyz da jol jóndegen janǵa tıer saýap mol emes pe? Qıqy-jıqy joldan mezi bolǵan el dańǵyraǵan tas jolǵa túskende Satybaldyǵa razy bolyp, «Jolyń bolǵyr!» dep talaı aıtty. El tilegi jerde qalmady. Keıinnen energetıka salasyna qaraı oıysady. Buǵan deıin «Jolyń bolsyn!» degen alǵysqa bólengen atpal azamat endi el-jurttyń «Kóziń ashylǵyr!» degen aqjarma tilegin aldy.

Biliktini qaı zamanda da qadirlegen. Mamandyǵyna adal arda azamattyń omyraýyna «Qurmet» ordeni taǵyldy. Buǵan qosa onyń «Qurmetti energetık» ataǵyn ıemdengeni, omyraýynda jarqyraǵan «Eńbek ardageri» medali eseli eńbeginiń jemisi emes pe?! Energetıka salasyn damytýǵa orasan zor úles qosqany úshin Qazaqstan Elektrenergetıka qaýymdas­tyǵy­nyń «Eńbek sińirgen energetık» qurmetti ataǵymen, Qazaqstan Energetıka mınıs­trliginiń «Elektr energetıkasy salasyna qosqan úlesi úshin» medalimen, «Qurmetti ener­­getık» tósbelgisimen, Ener­getıka mınıs­trliginiń arnaıy medali­men marapattaldy. Energetıka mınıstr­li­giniń, Qazaqstan Elektrenergetıka qaýymdas­ty­ǵynyń jáne «Samuryq-Energo» AQ «Qurmet» gramotalarymen marapat­taldy. Al «Qurmetti qurylysshy» tósbelgisiniń Satybaldy Ábdiǵapparuly úshin orny bólek. Marapattary týraly sóz qozǵaǵanda «Samuryq-Energo» AQ-nyń 10 jyldyǵyna arnalǵan merekelik medalin de aıtpaı ketýge bolmas. Kópke kómegin aıamaıtyn janashyr azamatqa «Jambyl oblysy Talas aýda­ny­nyń qurmetti azamaty» ataǵy da berildi. Mu­nyń bári – onyń eńbeginiń ádil baǵasy.

Satybaldy Ábdiǵapparuly Moınaq GES-i, Shardara GES-i, Balqash GES-i, «Ermensaı» QS, «Alataý» QS, «Besaǵash» QS, «Altaı» QS, «Jas qanat» QS jáne bas­qa da birqatar energetıkalyq sektor obek­tileriniń qurylysyn basqardy. Al Eki­bastuz GRES-2 kómir berý konveıerlik jelisiniń qulaý sebepterin anyqtaýǵa jáne ony qysqa merzimde qalpyna keltirýge sińirgen eńbegi – óz aldyna bir tóbe.

Satybaldy Ábdiǵapparulynyń negizgi mamandyǵy – ınjener-qurylysshy. Sony­men birge zańger, ekonomıst. Ol bir emes, birneshe mamandyqty qatar meńgergen segiz qyrly, bir syrly azamat desek, artyq aıtqandyq emes. «Jigitke jeti óner de az» degen naqyldy bizdiń Sákeń dáleldeı túskendeı.

Halqymyzdyń batyr uly Baýyrjan Momyshuly adam qartaıǵanda úsh túrli bolady degen eken. Sonyń ishinde bizdiń Sákeńe aýzynda dýasy bar, eline máýeli, syıly qarııa ataný baqyty buıyrdy. О́mirlik serigi ekeýi ósirgen ónegeli urpaqtary bú­ginde elimizdiń damýy jolynda ár salada jemisti eńbek etip júr. Satybaldy Ábdi­ǵap­paruly sol ul-qyzdarynan taraǵan n­emere-shóberelerine óziniń ónegeli ómirinen salı­qaly syr shertip, jaqsy tárbıe berip otyr­ǵan asqar taý ata atandy. Máýeli báı­terek sekildi jaıqalyp ósip-óngen úlken áýletke aınaldy.

«Alataý Jaryq» kompanııasynyń ujymy