«Qaza bolǵandardyń tizimine qatysty aıtsam, ol jarııalanady, kópshilikke málim bolady. Buǵan deıin aıtqanymdaı, ol tizimde, lańkestik toptyń dep aıtsaq bolatyn shyǵar, sol taraptyń jaǵynda júrip qaza bolǵandar óte kóp. Olar óz áreketteri arqyly memlekettik qurylymymyzdy ydyratqysy keldi», dedi Qasym-Jomart Toqaev referendýmda daýys berip bolǵannan keıin.
Prezıdenttiń aıtýynsha, bul máseleniń ekinshi qyry bar.
«Biraq memleketimizge taban astynan qarsy shyqqan toptarǵa qatysy bolmaǵan adamdar da bar. Osyǵan baılanysty, árıne, biz qaıǵyryp, kóńil aıtamyz. Azamattarǵa qarsy aqtaýǵa kelmeıtin áreketterge barǵan áskerı qyzmetshilerdiń bári jaýapkershilikke tartylatyny túsinikti. Tergeý júrip jatyr, ballıstıkalyq saraptamalar ótip jatyr. Sondyqtan bári aıqyndalady», dedi Memleket basshysy.
