Akademık M. Jurynovtyń baıandaýynsha, táýelsizdik tarıhynda tuńǵysh ret referendým arqyly Konstıtýsııaǵa ózgerister enip, halyqtyń qalaýyna múmkindik berilip otyr. Referendým nátıjesi boıynsha qoldanystaǵy zańdar ózgerip, 200-den astam zań kúshi qujattarǵa qol qoıylady. Bul ózgerister Jańa Qazaqstannyń negizin qalaıdy.
«Búgin men saılaý ýchaskesine elimizdiń bolashaǵy úshin daýys berýge keldim. Biz sybaılas jemqorlyq pen jumyssyzdyqpen kúresýge, halqymyzdyń ál-aýqatyn nyǵaıtýǵa tıispiz. Endi sheginerge jol joq. Halyqtyń kózi ashyldy. Burynǵy súrleýdi qabyldamaıtynyn kórip otyrmyz. Referendým jarqyn bolashaqqa jańa jol ashady. Árbir qazaqstandyqtyń bul naýqannan shet qalmaı, daýys berýin qalaımyn. Referendým nátıjesi Memleket basshysy Qasym-Jomart Toqaevtyń qolyndaǵy mandat. Osyny túsinýimiz kerek», dedi Murat Jurynov.
Akademık M.Jurynov aıtyp ótkendeı, referendým, eń aldymen jastarǵa kerek ekenin aıtty. Bolashaq Qazaqstannyń arhıtektýrasy referendým nátıjesine qarap aıqyndalady. Daýys berý árbir jastyń, árbir qazaqstandyqtyń qasıeti boryshy. «Men eldiń bolashaǵy úshin daýys berdim» dep sózin túıindedi akademık.
Ǵalym № 17 mektep-ınternatta ornalasqan № 537 saılaý ýchaskesinde daýys berdi.
