Kezdesý barysynda saıası, saýda-ekonomıkalyq, ınvestısııalyq jáne mádenı-gýmanıtarlyq yntymaqtastyqty nyǵaıtýǵa basa mán bere otyryp, Qazaqstan men Saýd Arabııasy arasyndaǵy qatynastardy damytýdyń perspektıvalary talqylandy.
Memleket basshysy Koroldiktiń syrtqy saıası vedomstvo basshysyna iltıpat bildire otyryp, onyń bul sapary elimizdiń tarıhyndaǵy betburysty sátpen – jalpyulttyq referendýmmen tuspa-tus kelgenin atap ótti. Atalǵan asa mańyzdy sharanyń qorytyndysy Jańa Qazaqstan qurýǵa kirisýge múmkindik beredi.
Qasym-Jomart Toqaev Saýd Arabııasy Qazaqstannyń arab jáne ıslam álemindegi basty seriktesiniń biri ekenin atap ótti.
– Elderimiz ortaq qundylyqtarǵa negizdelgen saıası dıalogty dostyq pen ózara senim rýhynda dáıekti túrde damyta beredi. Eki qasıettiniń Saqtaýshysy Korol Salman ben Ábdel Ázızben jáne Taq murageri Muhammed ben Salmanmen aradaǵy tabysty yntymaqtastyqty odan ári jalǵastyrýǵa daıyn ekenimizdi bildiremin, – dedi Prezıdent.
Qasym-Jomart Toqaev aýyl sharýashylyǵy, munaı hımııasy, týrızm, taý-ken metallýrgııasy jáne qarjy salalaryndaǵy birlesken jobalardy júzege asyrý úshin qolaıly ınvestısııalyq múmkindikterdiń bar ekenine nazar aýdardy.
Bul rette Memleket basshysy Qazaqstan men Saýd Arabııasynyń úkimetaralyq komıssııasy men Iskerlik keńestiń jumysyn jandandyrý mańyzdy ekenine toqtaldy. Sondaı-aq tıisti kelissózderdi júrgizý úshin ókiletti úkimettik delegasııany Er-Rııadqa jiberýge daıyn ekenin aıtty.
Budan bólek Memleket basshysy Mekke men Medınede qazaqstandyq qajylarǵa qajetti jaǵdaı jasalatyny jáne dástúrli qonaqjaılyq kórsetiletini úshin Koroldiktiń basshylyǵyna rızashylyǵyn bildirdi.
Feısal ben Farhan Ál Saýd Saýd Arabııasy Koroli men Taq murageriniń Prezıdent Qasym-Jomart Toqaevqa jáne Qazaqstan halqyna joldaǵan sálemin jetkizdi.
Mınıstr eki memleket arasyndaǵy qarym-qatynastardyń dáıekti túrde damyp kele jatqanyn atap ótti. Sondaı-aq Koroldik basshylyǵynyń dıplomatııalyq baılanystar ornaǵannan bergi jan-jaqty yntymaqtastyq baǵyttaǵy jetistikterdi joǵary baǵalaıtynyn aıtty.
Saýdııalyq dıplomat Qazaqstan Prezıdentin elimizde referendýmnyń tabysty ótýimen quttyqtady.
– Saýd Arabııasy Koroldigi Sizdiń basshylyǵyńyzben Ekinshi Respýblıkany qurý isinde jáne Qazaqstannyń odan ári órkendeýine baǵyttalǵan aýqymdy reformalardy júzege asyrýdy jalǵastyrýda tabys tileıdi, – dedi mınıstr.
Feısal ben Farhan Ál Saýd saýda-ekonomıkalyq jáne ınvestısııalyq yqpaldastyqty nyǵaıtýdyń perspektıvalaryn egjeı-tegjeıli talqylaý úshin qazaqstandyq seriktestermen kezdesý uıymdastyrýǵa Saýdııa tarapy daıyn ekenin jetkizdi. Bul jýyq arada Qazaqstanda joǵary deńgeıdegi kezdesý ótkizý úshin berik negiz bolady.
Sonymen qatar kezdesýde olar halyqaralyq kún tártibiniń ózekti máseleleri jóninde pikir almasty.
Áńgimelesý sońynda Qasym-Jomart Toqaev Korol Salman ben Ábdel Ázızge jáne Taq murageri Muhammed ben Salman Ál Saýdqa júrekjardy sálemin joldady.
