Elimiz boıynsha 2021-2025 jyldar aralyǵynda salynyp jatqan mektepterdiń tórtten bir bóligi – Túrkistan oblysyna tıesili. Tórt jylda óńirde 199 mektep boı kóteredi. Bıyl 59 mekteptiń qurylys jumystaryn júrgizýge 20 mlrd teńgeden astam qarjy qaraldy. Al oblys ortalyǵy Túrkistan qalasynda 2025 jylǵa deıin 10-nan astam mektep salynady dep josparlanýda. О́tken jyly 900 oryndyq mektep, 720 oryndyq Nazarbaev zııatkerlik mektebi 120 oryndyq jataqhanasymen salyndy. Budan bólek, 6 jekemenshik mektep paıdalanýǵa berildi. Bıyl Túrkistan qalasyndaǵy «Turkistan» AEA» ákimshilik-iskerlik aýmaǵynda «Nurorda» halyqaralyq mektebiniń» qurylysy bastalady. Tórt tilde bilim beretin halyqaralyq mektepte barlyq jaǵdaı jasalmaq. Bilim berý kesheninde fýtbol alańy, jataqhana jáne basseın salynady. Jospar boıynsha mektep 2024 jylǵy jańa oqý jylynda ashylady dep kútilýde. Jalpy bilim berý mekemeleriniń jetispeýshiligin joıý maqsatynda jekemenshik mektepterge jan basyna shaqqandaǵy qarjylandyrý júıesi de qolǵa alynyp otyr. Iаǵnı kásipker mektep salyp, onda bilim alatyn árbir oqýshy úshin memlekettik baǵdarlama aıasynda qaıtarymsyz qarjyǵa ıe bola alady. Mysaly, Saıram aýdany, Mankent aýylynda jeke kásipker 4 birdeı mektep salýda. Investor sońǵy on jylda salǵan 8 balabaqsha men 4 jekemenshik mektepte 13 myńnan astam bala tálim-tárbıe alýda. Jeke kásipker Nızamhan Sýlaımanov salyp jatqan 1 200 balaǵa arnalǵan ár mekteptiń quny 1,5 mlrd teńgeden aspaıdy. Qańtar aıynda qurylysy bastalǵan zamanaýı úlgidegi bilim uıalary jospar boıynsha bıylǵy oqý jyly paıdalanýǵa berilmek.
Oblys ákimi О́mirzaq Shókeev ınvestorǵa Túrkistan qalasynan mektep salý týraly usynys jasaǵan. Kásipker aldaǵy ýaqytta taǵy 4 mektep salýdy kózdep otyr. Investordyń ıeligindegi 1 200 oryndyq balabaqsha óńirdegi eń úlken balabaqsha bolyp esepteledi. Sondaı-aq Saıram aýdany, Qarabulaq aýylynda 2 200 oryndyq orta mektep jumys isteıdi. Bilim oshaǵy elordadaǵy Nazarbaev ýnıversıtetiniń jobasymen salynǵan. Mekteptiń úlken májilis zaldary, kitaphana, sport zaly men 450 oryndyq ashanasy bar. О́skeleń urpaqty eńbekke baýlýǵa baǵyttalǵan pánder ótiletin synyptardyń jasaqtalýy da ózgeshe. Barlyq mektepte balalar memlekettik baǵdarlama aıasynda aqysyz bilim alady. Oqýshylardy tegin tasymaldap, ystyq tamaqpen qamtamasyz etedi. Qosymsha úıirmeler tegin. Úzdikterge arnaıy stıpendııa taǵaıyndalǵan. Mine, osy baǵyttaǵy, ıaǵnı jekemenshik mektepterdiń sany óńirde arta túspek. Bul maqsatta ınvestorlardy tartý jumysy kúsheıtilmek. Sondaı-aq shalǵaıdaǵy eldi mekenderde turatyn oqýshylardy arnaıy avtobýstar tasymaldaıtyn bolady. Ol úshin jańa avtobýstar satyp alynady. Mysaly, bıylǵy jańa oqý jylyna oblystyq bıýdjetten Ordabasy aýdanyna 15 jańa avtobýs beriletin bolady. Al Shubarsý aýylynda bıyl 3 jekemenshik mektep paıdalanýǵa beriledi. Jýyrda aptalyq apparat otyrysynda oblys ákimi aýdan, qala ákimderine bilim uıalarynyń máselelerin nazarda ustaýdy, adamı áleýetti damytý basqarmasymen birlese ózekti máselelerdi sheshýdi tapsyrdy.
Oqýshylardyń densaýlyǵy men qaýipsizdigi de nazardan tys qalǵan emes. Mysaly, bıyl mektep oqýshylaryn profılaktıkalyq tekserýden ótkizýge jáne saýyqtyrý is-sharalaryn atqarýǵa 26,1 mlrd teńgege medısınalyq uıymdarmen shart jasaldy. Jyl basynan beri mektep medısınasyna shamamen 6,4 mlrd teńgege qyzmet kórsetildi.
«Mektep oqýshylary men mektepke deıingi mekemelerdiń medısınalyq qamtamasyz etilýin uıymdastyrý týraly oılaıtyndar az. Mektep medısınasy bilim berý uıymdarynda, ıaǵnı tikeleı mektepterde, balabaqshalarda, shaǵyn ortalyqtarda nemese basqa da bilim berý uıymdaryndaǵy balalarǵa medısınalyq qyzmet kórsetýdi kózdeıdi. Buryn mektep medısınasy ýchaskelik qyzmetke bólingen qarajat esebinen qarjylandyrylǵan. MÁMS júıesi engizilgen soń, mektep medısınasyna erekshe kóńil bóline bastady. Bul mektep jasyndaǵy balalarǵa arnalǵan aldyn alý sharalarynyń keń aýqymyn qamtamasyz etýge múmkindik beredi», deıdi «Áleýmettik medısınalyq saqtandyrý qory» KEAQ Túrkistan oblysy boıynsha fılıalynyń dırektory Ashat Beısenbaev.
Mektep medısınasynyń tarıfine vaksınalaý, jyl saıynǵy profılaktıkalyq tekserý, tis dárigeriniń tikeleı oqý ornynda ótkiziletin tekserýi kiredi. Oqý ornyndaǵy dárigerler balalardyń salamatty ómir saltyn ustanýy boıynsha is-sharalar ótkizedi. Shuǵyl jaǵdaılarda medısınalyq pýnktte jedel járdem brıgadasy kelgenge deıin balalarǵa alǵashqy kómek kórsetiledi. Sondaı-aq balalar qaýipsizdigin qamtamasyz etý maqsatynda oblystaǵy 943 mekteptiń 563 kamerasy jedel basqarý ortalyqtaryna qosyldy. Bul jalpy mektepterdiń – 60%-y. Tehnıkalyq múmkindigi bar 750-ge jýyq mektepti jedel basqarý ortalyqtaryna shyǵarý josparlanyp otyr.
Túrkistan oblysy
