«Jyl basynan beri memlekettik bıýdjettiń shyǵystary 98,5%-ke, respýblıkalyq bıýdjettiń shyǵystary – 99,1%-ke, jergilikti bıýdjetterdiń shyǵystary 98,3%-ke atqaryldy. Respýblıkalyq bıýdjet boıynsha 6,9 trln teńge somasyna shyǵystar júrgizildi. Sonymen birge bıýdjettiń 65 mlrd teńgesi atqarylmaǵan, onyń ishinde 7 mlrd teńge – únemdelgen, 58 mlrd teńge ıgerilmeı qalǵan», dedi Qarjy mınıstri Úkimettiń búgingi otyrysynda.
Igerilmeýdiń anaǵurlym iri somalary tótenshe jaǵdaılar, ishki ister, densaýlyq saqtaý, ekologııa, geologııa jáne tabıǵı resýrstar mınıstrlikterinde baıqaldy. Igerilmeýdiń negizgi sebepteri: konkýrstyq rásimder men sharttar jasasý rásimderiniń uzaq júrgizilýi, oryndalǵan jumystar aktilerin, shot-faktýralardy ýaqtyly usynbaý, tóleýge beriletin shottardyń kesh usynylýy.
Jergilikti bıýdjetterdiń shyǵystary 3,5 trln teńgeni qurady. 61 mlrd teńge atqarylmaı qalǵan.
«Bıyl óńirlerge 3,3 trln teńge somasynda nysanaly transfertter kózdelgen. Olarǵa 1 maýsymǵa 933 mlrd teńge bólingen. Onyń 98,2%-i ıgerilgen. 17 mlrd teńge atqarylmaı qaldy, onyń ishinde 4 mlrd teńge únemdelse, 13 mlrd teńgesi ıgerilmegen», dedi E. Jamaýbaev.
Eń kóp ıgerilmegen soma Nur-Sultan qalasynda, Mańǵystaý, Almaty jáne Qyzylorda oblystarynda baıqalady. Onyń negizgi sebepteri - tólemniń negizdiligin rastaıtyn qujattardyń usynylmaýy, jobalyq-smetalyq qujattamany túzetý, oryndalǵan jumys aktilerin ýaqtyly usynbaý, konkýrstyq rásimderdiń uzaq júrgizilýi, tóleýge beriletin shottardyń qazynashylyq organdaryna kesh usynylýy.
Aıana Toǵanbek
