Álemniń barlyq elderi azyq-túlik baǵasynyń qarqyndy ósýine tap boldy. Saýdadaǵy shekteýler azyq-túlik tapshylyǵy bar aımaqtar úshin jaǵdaıdyń odan ári shıelenisýine ákeledi.
Bul taqyryp osy kúnderi Jenevada Qazaqstannyń tóraǵalyǵymen ótip jatqan DSU-nyń 12-shi mınıstrlik konferensııasynda nazardan tys qalǵan joq.
Qazaqstan delegasııasynyń basshysy QR Premer-Mınıstriniń orynbasary – Saýda jáne ıntegrasııa mınıstri Baqyt Sultanov Azyq-túlik qaýipsizdigi máselelerine arnalǵan sessııada saýda jáne azyq-túlik qaýipsizdigi jónindegi mınıstrlik deklarasııasynyń jobasyn jáne Dúnıejúzilik azyq-túlik baǵdarlamasyn satyp alýǵa qatysty eksporttyq shekteýlerdi qoldanbaý týraly sheshim qabyldaýdyń mańyzdylyǵyn atap ótti. Bul sheshim, tipti mundaı ónimdi jekelegen elderden tys jerlerge áketýge tolyq tyıym salynǵan jaǵdaıda da, apatqa ushyraǵan óńirlerge azyq-túlik jetkizýdiń gýmanıtarlyq baǵdarlamalaryn júzege asyrýǵa múmkindik beredi.
Premer-Mınıstrdiń orynbasary – Saýda jáne ıntegrasııa mınıstri Baqyt Sultanov: «DSU-nyń barlyq elderin Qazaqstannyń úlgisimen júrýge jáne osy konferensııadan álemdik azyq-túlik daǵdarysynan arylýǵa múmkindik beretin naqty sheshimder qabyldaýǵa shaqyramyn», dedi.
Aıta ketsek, DSU-nyń 12-shi mınıstrlik konferensııasy Álemdik saýda saıasatyndaǵy mańyzdy oqıǵa sanalady.
