Máseleni sheshý maqsatynda sońǵy birer aıdan beri turǵyn úı komıssııasy belsendi jumysqa kirisken. Jumystyń ashyqtyǵy men jarııalylyǵyn qamtamasyz etý úshin tizimge qoǵamdyq birlestikter jáne depýtattardan turatyn baqylaýshylar engizilgen kórinedi. Baspana kezegine negizinen múgedekter, kópbalaly otbasylar, áleýmettik qorǵaýdy qajet etetin adamdar tizimdeletini belgili. Biraq tekserý barysynda kezekte turǵandardyń kópshiligi tıisti jeńildikterin dáleldeı almaǵan. Tizimdi qaıta tekserý negizinde 2 054 azamat kezekten alynyp tastalǵan eken. Onyń ústine 2015 jyldan beri baspana berýde qala ákimdigi tarapynan retsizdikter oryn alyp, sonyń saldarynan qoldanystaǵy úılerdi qujattandyrýda da qıyndyq týyp otyr eken.
– Buǵan deıingi berilgen páterlerdiń basym bóligi «Nurly jer» baǵdarlamasy sheńberinde jeńildikpen kredıtteý boıynsha alynǵan. Turǵyn úı kezegindegi ashyqtyqty saqtaý, sybaılas jemqorlyqtyń aldyn alý barysynda jańa júıe engizilgen. Kezek tolyǵymen elektrondy portalǵa aýystyrylǵan. Bul – sybaılastyqtyń aldyn alatyn tásil. Buǵan deıin turǵyn úı kezegi qyzmetkerlerdiń kompıýterindegi Excel kestesi boıynsha júrgizilgen. Olar jylyna bir ret kezekterin kórip, qujattaryn rettep otyrýy kerek bolǵan. Endi kez kelgen adam óz kezegin portaldan qadaǵalaı alady. Iá, Excel formatyndaǵy tizimderdi elektrondy kezekpen salystyrý kezinde 1 720 sáıkessizdik anyqtaldy. Tekserý kezinde kóptegen zań buzýshylyqtyń oryn alǵany da ashyldy. Mysaly, kezekte turǵan 576 adamnyń JSN-i bolmaı shyqty. Keıbir múgedek balanyń JSN-i, kezekke turý dáıegi anyqtalmaǵany da belgili boldy. Biz qazir bul máselemen aınalysyp jatyrmyz, – deıdi Taldyqorǵan qalasynyń ákimi Áset Masabaev.
Bıylǵy derek boıynsha oblys ortalyǵynda turǵyn úı kezeginde turǵan adamdardyń sany 16 333 shamasynda. Olardyń ishinde 6 myńnan astam adam bıýdjettik uıym qyzmetkeri eken. Al 10 006 adam halyqtyń áleýmettik osal toptaryna jatady. Olardyń qataryna kópbalaly otbasylar, tolyq emes otbasy, múgedek balalardy tárbıelep otyrǵan otbasy, múgedek, jetim balalar da bar. Alaıda baspanaǵa muqtaj topty úımen tolyq qamtýǵa múmkindik joq. Jalpy, qazir Taldyqorǵan qalasy turǵyn úı qurylysy qarqyndy júrip jatqan aımaq sanalady. Budan keıin de osy baǵyttaǵy jumys jalǵasa bermek. Byltyr qalanyń 9-shaǵyn aýdanynda bıýdjet qarjysyna 35 turǵyn úıdiń qurylysy bastalǵan. Bıyl osy shaǵyn aýdanda taǵy 54 páterli 9 qabatty turǵyn úıdiń qurylysy bastalady.
Al Taldyqorǵan qalasynyń kommýnaldyq menshiginde 1993-2020 jyldar aralyǵynda qoldanysqa berilgen 3 235 turǵyn úı bar. О́kinishke qaraı, 2015 jyldan beri 1 014 turǵyn úıdiń qujaty zańdastyrylmaǵan kórinedi. Iаǵnı azamattardy turyp jatqan turǵyn úıge qonystandyrý týraly sheshim shyǵarylmaǵan. Qujattary joq 330 páter jeke tulǵalarǵa jáne jumys istep júrgen memlekettik qyzmetshilerge berilgen. Atalǵan máseleni sheshý maqsatynda páterlerdi vedomstvolyq maqsatqa paıdalaný úshin tıisti qurylymdarǵa bekitip berý usynyldy.
– Bul baǵytta úı berilgen árbir azamattyń buryn kezekte turǵan-turmaǵany, kezek reti anyqtalyp, soǵan sáıkes zań aıasynda sheshim qabyldanatyn bolady. Bul rette áleýmettik áljýaz toptaǵylardyń jaǵdaıy eskeriledi. Memlekettik qyzmetshilerdiń úıi qyzmettik úı retinde rásimdelýi múmkin. Qalaı bolǵanda da, jyldar boıy qordalanyp qalǵan túıindi máseleni sheshýdi qolǵa alyp jatyrmyz, – deıdi qala ákimi Áset Masabaev.
Jalpy, qalada turǵyn úı máselesimen qatar basqa da kommýnaldyq-sharýashylyq qurylymyna qatysty sheshimin kútken jaǵdaılar bar. Sonyń biri, ishki joldardyń jaǵdaıy. Qaladaǵy avtomobıl joldarynyń jalpy uzyndyǵy 661,3 shaqyrymdy quraıdy. Al Taldyqorǵanda 640 kóshe bar. Bıyl 70,9 shaqyrym jol men 105 kósheni jóndep, kútip ustaýǵa bıýdjetten 4,8 mlrd teńge qarjy bólingen. Sondaı-aq uzyndyǵy 18,9 shaqyrym bolatyn 27 kósheni jańadan salýǵa taǵy 2 mlrd teńge jumsalmaq. Aýlalar men balalardyń oıyn alańdaryn abattandyrý da kezekte tur. Al qala boıynsha 814 turǵyn úıge tıesili 275 aýla bar.
Oblys ortalyǵynda qoǵamdyq dárethanalardyń joqtyǵy da turǵyndar men qonaqtardyń «bas aýrýyna» aınalǵan. Al qala ákimdigi bul máseleni túbegeıli sheshý úshin bıýdjet qarjysyn jumsaýǵa sheshim qabyldapty. Iаǵnı bıyl qoǵamdyq dárethanalar satyp alýǵa 8,5 mln teńge qarastyrylǵan.
Jetisý oblysy
