Qazirgi tańda Shyǵysta joǵary tehnologııalyq medısınalyq kómektiń 27 túri kórsetiledi. Bıyl sońǵy bes aıda ǵana atalǵan tehnologııa ádisimen 170 operasııa jasalǵan. Joǵary tehnologııalyq medısınalyq kómek dep otyrǵanymyz, kespeı-tilmeı ota jasaý. Bul ádistiń bir tıimdiligi – naýqastar úshin asa qaýipti emes. Dárigerlerdiń de qoly uzarǵan. Máselen, jýyqta ǵana Ana men bala ortalyǵynda ýrologııalyq aýrýlar anyqtalǵan bir jastan on bir jasqa deıingi 11 balaǵa zamanaýı ádispen operasııalar jasaldy. Ol úshin «UMC» korporatıvtik qorynyń «Ana men bala ulttyq ǵylymı ortalyǵy» AQ balalar ýrologııa bólimshesiniń meńgerýshisi, balalar ýrolog-andrologi, medısına ǵylymdarynyń kandıdaty Ardaq Aınaqulov О́skemendegi áriptesterine praktıka júzinde sheberlik saǵattaryn ótkizdi.
– Ýrologııalyq aýrýlardyń birine operasııa jasadyq. Aýyz qýysynyń shyryshty qabatyn qoldana otyryp, ýretranyń jetispeıtin bóligine operasııa arqyly jalǵanady. Bul operasııalar sheberlik synybynda jas dárigerlerge kórsetildi, – deıdi A.Aınaqulov.
Sondaı-aq bilikti dáriger sheberlik saǵatynda qýyqqa túsken tastardy bólshekteıtin biregeı apparat Auriga XL kómegimen nesep-tas aýrýy bar balalardy emdeýdi úıretti. AQSh shyǵaratyn bul lazerlik lıtotrıptor Ana men bala ortalyǵynda ǵana bar. Demek hırýrgııasyz qýyqtaǵy tastardy usaqtaýǵa bolady.
Joǵary tehnologııalyq medısınalyq kómektiń damyǵany sondaı, mıdaǵy isikti de kespeı-aq alyp tastaýǵa bolady eken. Shyǵysqazaqstandyq dárigerler ony da meńgere bastady.
– Júıeli túrde ótkizilip turatyn sheberlik sabaqtarynyń nátıjesinde úlken jetistikterge jettik. Buryn mıdaǵy isikti alý úshin bas súıekti kesýge týra keletin. Qazir muryn qýysy arqyly isikti alyp tastaı alamyz. Budan bylaı joǵary tehnologııalyq kómektiń bul túri bizdiń óńir turǵyndary úshin qoljetimdi bolady, – deıdi oblystyq mamandandyrylǵan medısınalyq ortalyqtyń ınnovasııalyq medısına meńgerýshisi Jandos Ýap.
Aıta ketsek, medısına qyzmetkerleri kúni qarsańynda mundaı operasııa Shyǵys Qazaqstanda alǵash ret ótti. Neırohırýrgterdiń pikirinshe, eń qıyn, eń kúrdeli operasııa osy eken. Shyǵysqazaqstandyq hırýrgterdiń sheberlikterin shyńdaý úshin О́skemenge Nur-Sultan qalasynyń «Ulttyq neırohırýrgııa ortalyǵynyń» transnazaldy endoskopııalyq neırohırýrgııa bóliminiń neırohırýrg-dárigeri, medısına ǵylymdarynyń kandıdaty Danııar Teltaev kelgen. Ekikúndik sheberlik synyptarynda muryn arqyly mı isigin alyp tastaýdyń birqatar operasııasy júrgizildi.
Operasııaǵa alynǵan tórt naýqas ta oblys turǵyndary. Olar birneshe jyl boıy kórý qabiletteriniń nasharlaýyna shaǵymdanǵan. Okýlıster de teksere kele mıda isiktiń baryn aıtqan. Ony MRT tekserýleri de rastaǵan eken. Bilikti dárigerlerdiń aıtýynsha, sál keshikse, kózderi múldem kórmeı qalýy múmkin edi.
– Bas-súıekti jaraqattamaı muryn qýysy arqyly isikti kesip alamyz. Buǵan О́skemendegi neırohırýrgterdiń qabiletteri jetkilikti. Eger, operasııa sátti aıaqtalsa, pasıentterdiń kórý qabileti qalpyna keledi, – dep atap ótti neırohırýrg dáriger Danııar Teltaev.
Jyl sońyna qaraı joǵary tehnologııalyq medısınalyq kómektiń taǵy 14 túri engizilmek. Bul úshin onkologııa ortalyǵyna, oblystyq aýrýhanaǵa, Ana men bala ortalyǵyna qosymsha jańa medısınalyq qurylǵylar satyp alynady. Al zamanaýı qurylǵylardyń tilin túsiný úshin 19 dáriger Izraılde biliktilikterin kóterip kelmek.
Shyǵys Qazaqstan oblysy
