Qazanshuńqyr jabyldy, qorqynysh seıildi

Rıdder qalasynda jerasty shahtasynyń ústińgi qabaty opyrylyp, alyp qazanshuńqyrǵa siriń­keniń qorabyndaı aýnap túsken úı turǵyndardy úreılendirgeni belgili. Qazirgi tańda qala jurt­shylyǵy, ásirese, apat bolǵan aýmaqtyń otbasylary kóńilderin bılegen qorqynyshtan birtindep seıile bastady. Muny Rıdderge barǵan saparymyzda ańdadyq. Oqıǵa oryn alǵannan bergi eki aptadan astam ýaqytta birqatar keshendi jumystar atqaryldy. Búginde alyp qazanshuńqyrdyń erneýi tolyq toltyrylǵan. Qyrtysty bekitý úshin oǵan beton quıylǵan eken. Jer astynda 5 kólbeý tirek júıesi ornatylypty. Búginde altynshysy jasalyp jatyr. Salmaq jaǵdaıyn tekserý baǵytynda qosymsha baqylaýǵa arnalǵan burǵylaý jumystary júrgizilýde. Osy ýaqytqa deıin 629 metr aýmaq burǵylanǵan. Bul jumys ta jalǵasyn tabýda. Aýdanda jerdiń betki qabatynyń jaǵdaıyna monıtorıng jasaýǵa arnalǵan eki baqylaý stansasy ornatyldy. Kenishtiń ıesi sanalatyn «Qazsınk» JShS men qala ákim­digi arasynda memorandým qabyldandy. Osy qujatqa sáıkes kásiporyn apat aýmaǵyndaǵy úıler ornalasqan Alqap kóshesin jaryqtandyrý, jol salý jáne kóriktendirý jumystaryn júr­gizýge ýáde berdi. Qazirdiń ózinde О́zen kóshesi boıyna qıyrshyq tas­tan jol tóselse, Alqap kóshesiniń boıymen «Rechnoı» dúkenine deıin 19 kóshe shamy qoıylǵan. Al jabylǵan qazanshuńqyr aýmaǵynyń ústinde balalarǵa arnalǵan oıyn nemese sport alańyn salý josparlanyp otyr. Muny túpkilikti sheshýdi kompanııa turǵyndardyń óz tańdaýyna qaldyrypty. Kompanııa jetekshileriniń aıtýynsha, úıinen aıyrylyp, apattan zardap shekken otbasyna eki úı beriledi. Olar páterge qajetti jıhazǵa ózderi tańdaý jasady. Qazir toltyrylǵan qazanshuńqyr mańaıynda ornalasqan ǵıma­rattarǵa qaýip tónip turǵan joq. Arnaıy qurylǵan komıssııa teh­nıkalyq tekserý jumystaryn jalǵastyryp jatyr. – Aýmaqty tolyǵymen qaýipsiz dep taný úshin bilikti geologııa mamandary jumys isteýde. Qaýipti aýmaq ornynda tótenshe jaǵdaılar departamentiniń mamandary bar top qurylǵan. Sondaı-aq, Rıdder qalasy ákimdigimen kelise otyryp, táýelsiz konsaltıng kompanııasymen aýmaqtaǵy úılerdi baǵalaý júrgizilip jatyr. Konsaltıng fırmasy ár úıge qandaı deńgeıde zaqym kelgenin anyqtap, ózderiniń tehnıkalyq sıpattamasyn beredi, – dedi «Qazsınk» JShS vıse-prezıdenti Andreı Lazarev. Kompanııa ókilderi oqıǵa oryn alǵan kúnnen beri turǵyndardyń bastamashyl tobymen kún saıyn kezdesip, sarapshylarmen tyǵyz jumys júrgizgenderin jetkizdi. Olardyń aıtýlarynsha, 16 ýchaskeniń ishinde qaýipti aýmaqqa 11 úı men 1 dúken jatqyzylǵan. Al qalǵan 4 ýchas­kede turǵyn úı joq. Búginde qaýipsiz jerge kóshirilgen turǵyndar óz úılerine oralyp jatyr. «Qazsınk» pro­fılaktorııinde óz úıine oralýǵa júreksinip otyrǵan 5 otbasy qa­lypty. Olardyń densaýlyǵy men tamaqtanýy jáne taǵy basqa turmystyq máselelerimen kompanııa mamandary shuǵyldanýda. Turǵyndar kásiporyn tarapynan 6 mln. 900 myń teńge kóleminde ótemaqy aldy. – Zardap shekkken turǵyn­dardyń talap-tilegimen arnaıy komıssııa muqııat tanysyp, barlyǵyn eskerýi tıis, – dedi apat saldaryn joıý jumystarymen tanysý barysynda óńir basshysy Berdibek Saparbaev. Oblys ákimi arnaıy komıs­sııa quramynda mindetti túrde jergilikti zardap shekken tur­ǵyndardyń ókilderi bolýy kerek­tigin, atalǵan aýmaqqa qatys­ty arnaıy baǵdarlama daıyndalatynyn, jergilikti turǵyndarǵa qajetti ınfraqurylym máseleleri sheshiletinin atap ótti. Dýman ANASh, «Egemen Qazaqstan». Shyǵys Qazaqstan oblysy, Rıdder qalasy.