Jastar arasynda bıyl onynshy ret uıymdastyrylyp otyrǵan týrnır Sıdneı olımpıadasynyń jáne Álem chempıonatynyń kúmis júldegeri, Azııa oıyndarynyń jeńimpazy, Ońtústik Qazaqstan oblysynyń, Maqtaral aýdanynyń Qurmetti azamaty, Qazaqstan Respýblıkasynyń eńbek sińirgen sport sheberi Muhtarhan Dildábekovtiń júldesine arnaldy. Bes kún boıy baǵy men babyn synaǵan boksshylar arasyndaǵy ár kezdesý tartysty da shıelenisti ótti. Degenmen salmaq dárejesinde jeńimpaz atanǵandar arasynda Túrkistan oblysynyń jáne Qyrǵyzstannyń boksshylary basym. Mysaly, Túrkistan oblysynyń sportshylary Nurǵısa Turabekov, Nurıslam Qaldybaev, Ádilet Elemes, Arhat Turǵynbek, Sadrıddın Abdýlla óz salmaq dárejelerinde aldyna jan salmady. Sondaı-aq 51 kılo salmaqta aqtóbelik Oralhan Turalın, 57 kıloda ózbekstannan kelgen boksshy Saıat Ilıasov, 67 kıloda Almaty qalasynan Nurbek Mýrsal, 75 kıloda Qyrǵyzstan sportshysy Ataı Asanbekov, 80 kıloda taǵy bir qyrǵyzstandyq Bekbol Mýrasbekov, 86 kıloda qyrǵyzstandyq Emırhan Rajapov, 92 kıloda Jambyl oblysynyń boksshysy Álıjan Qanatbek, 92+ kılo salmaq dárejesinde almatylyq Ersultan Sapar jeńimpaz atandy.
Týrnır jeńimpazdary men júldegerlerin el namysyn álemdik arenalarda qorǵap Olımpıada, Álem, Azııa chempıony atanǵan boksshylar – Ermaxan Ibraımov, Bolat Jumadilov, Galıf Jafarov, Muhtarhan Dildabekov, Birjan Jaqypov, Qaırat Eralıev quttyqtady. Sondaı-aq jeńimpazdarǵa arnaıy syılyqtardy UOK sport dıreksııasynyń basshysy Elsııar Qanaǵatov, Shymkent qalasy máslıxatynyń xatshysy Bahadyr Narymbetov, Túrkistan oblysy dene shynyqtyrý jáne sport basqarmasynyń basshysy Q.Joldyqaraev tabys etti.
TÚRKISTAN
