Prezıdent • 23 Maýsym, 2022

Prezıdent Qazaqstan polısııasynyń 30 jyldyǵyna arnalǵan jıynǵa qatysty

3758 ret kórsetildi

Memleket basshysy Qazaqstan polısııasynyń 30 jyldyǵyna arnalǵan saltanatty jıynǵa qatysty, Egemen.kz Aqordaǵa silteme jasap.

Prezıdent azamattardyń bárine teń múmkindik beretin qoǵam qurý, sonyń ishinde áıelder men balalardyń quqyǵyn qorǵaý basty mindet ekenin atap ótti.

– Taǵy bir mańyzdy mindet – áıelder men balalardy zorlyq-zombylyqtan qorǵaý.  Mınıstrlikte osyndaı isterdi tergeýmen aınalysatyn arnaýly bólim qaıta ashyldy. Meniń tapsyrmam boıynsha bıyl áıelder men balalarǵa keshendi qoldaý kórsetetin ortalyqtar quryldy. Bul ortalyqtar qazir pılottyq rejımde jumys jasap tur. Onda psıhologııalyq, quqyqtyq jáne medısınalyq kómek kórsetiledi. Sondaı-aq tıisti saraptamalar jasalady. Arnaıy daıarlyqtan ótken tergeýshi áıelder zardap shekken jandarǵa járdem beredi. Jalpy bul ortalyqtar tıimdi jumys istep jatyr. Mundaı ortalyqtardy búkil el aýmaǵynda ashyp, aýqymyn keńeıtý kerek. Úkimetke jáne ákimderge osy jumysty qolǵa alýdy tapsyramyn, – dedi Qasym-Jomart Toqaev.

Qasym-Jomart Toqaev polısııa qyzmetiniń kóbinese adam ómiri men densaýlyǵyna qater tóndiretin qaýipti mamandyq ekenin atap ótip, Táýelsizdik jyldarynda qyzmet babynda 815 qyzmetkerdiń qaza tapqany, 4,5 myńnan astamy jaraqat alǵany týraly derek keltirdi. Sondyqtan qoǵamnyń qaýipsizdigi men turaqtylyǵyn qamtamasyz etý isindegi ishki ister organdarynyń úlesin baǵalamaýǵa bolmaıdy.

– Biz tártip saqshylaryn qoldaýǵa árdaıym erekshe kóńil bólemiz. Keıingi jyldary polısııa qyzmetkerleriniń jalaqysy birneshe ret ósip, turǵyn úıdi jalǵa alý qunyna ótemaqy tóleý engizildi. Sonymen qatar ákimderge jergilikti bıýdjet esebinen qarjylandyrylatyn qyzmetterge 30 paıyzdyq ústemaqy belgileý quqyǵy berildi. Meniń tapsyrmama sáıkes bıylǵy 1 qazannan bastap jedel-izdestirý qyzmeti qyzmetkerleriniń eńbekaqysy kóteriledi. Biz polısııa qyzmetkerlerin quqyqtyq jáne áleýmettik turǵydan qorǵaýdy jaqsartý úshin keshendi sharalardy jalǵastyramyz, – dedi Memleket basshysy.

Prezıdent quqyq qorǵaý organdarynda qyzmet atqarýdyń jastar úshin tartymdy ári mártebeli bolýy mańyzdy dep esepteıdi. Úzdik polıseılerdi kótermelep, erekshelep, marapattaý isin qoldaıtynyn bildirdi. 

Memleket basshysy sońǵy kezderi quqyq qorǵaý organdarynyń qyzmet babyn asyra paıdalanýyna qatysty shaǵymdardyń jıilep ketkenin atap ótti. Prezıdent mamyr aıynda otandyq bıznes ókilderimen kezdesýinde kásipkerlerdiń kópshiligi tikeleı qysym kórip jatqany týraly shaǵymdanǵanyn aıtqan bolatyn.

Prezıdent Ekonomıkalyq tergeý qyzmetiniń óńirlerdegi jumysyna jaǵymsyz pikirler kóptep túsip jatqanyn erekshe atap ótti. Memleket basshynyń aıtýynsha, zańsyz áreketterden Ishki ister mınıstrligi qyzmetkerleri de tysqary emes. Keıbiri jemqorlyqqa qatysty aıtylyp otyr. 

– Bul búkil quqyq qorǵaý júıesiniń bedeline aıtarlyqtaı nuqsan keltiredi. Qarjy monıtorıngi agenttiginiń kúshin alaıaqtyqqa, qarjy pıramıdalaryna, kapıtal men resýrstardy shetelge zańsyz shyǵarý faktilerine baǵyttaý kerek. Agenttik kóleńkeli ekonomıkamen kúresetin negizgi memlekettik organǵa aınalýǵa tıis. Biz qoǵamda joǵary quqyqtyq mádenıet jáne sybaılas jemqorlyq pen zańsyzdyqtyń kez kelgen kórinisterine berik ımmýnıtet qalyptastyrýymyz kerek, – Qasym-Jomart Toqaev.

Belsendiler saıası partııalar men qozǵalystar qurýǵa yntaly ekenin málimdep, ishki jáne syrtqy saıasattyń ózekti máseleleri boıynsha ártúrli pikirleri men kózqarastaryn bildiredi. Bul – azamattyq qoǵamnyń jetilgenin kórsetetin tabıǵı prosess. Degenmen, Prezıdenttiń pikirinshe, azamattyq belsendilerdiń barlyq áreketi, sonyń ishinde narazylyq aksııalary qoldanystaǵy zańnamaǵa jáne parasattylyqqa qatań sáıkes kelýi óte mańyzdy.

– Zańdy buzýǵa, zańsyz áreketterge barýǵa, sonyń ishinde polısııa qyzmetkerleriniń adamdyq qadir-qasıetine, kásibı ar-namysyna qarsy baǵyttalǵan áreketterge baratyndar zańnamamyzǵa sáıkes jaýapkershilikke tartylady. Qazaqstannyń ulttyq múddesine qarsy áreket etetin kásibı arandatýshylar áshkerelenýi kerek, – dedi Memleket basshysy.

Jıyn sońynda Memleket basshysy salanyń birqatar qyzmetkerine memlekettik nagradalar tapsyrdy.

Sońǵy jańalyqtar

TúrkPA-nyń ataýy ózgeredi

Parlament • Keshe

Almaty joldaryn sý basty

Aımaqtar • Keshe

Uqsas jańalyqtar