Keshe «Astana Opera» teatrynda Elbasy Nursultan Nazarbaevtyń tóraǵalyǵymen elordany odan ári damytý máseleleri jónindegi keńes bolyp ótti.
Mine, elordamyzdy búkil dúnıe júzine astana retinde jarııalaǵanymyzǵa 16 jyl bolady. Osy jyldardyń ishinde biz qyrýar sharýalardy tyndyrdyq. Biz álemdegi erekshe ozyq qalalardyń biri retindegi elordamyzdy saldyq. Astana búginde ádemiligi jaǵynan da, adamdarǵa qolaılylyǵy jaǵynan da dúnıe júzindegi eń ozyq qalalardyń biri bolyp kele jatyr. Qalamyzdyń gúldenýine barlyq halyq, qala ákimdigi, osy otyrǵan barlyǵyńyz erekshe úles qostyńyzdar. Ol úshin tek qana rızashylyq pen rahmetimdi aıtamyn. Bul – bir. Degenmen, biz eshýaqytta istegenimizge toqmeıilsip toqtap qalmaımyz, qalamyzdy odan ári damytý jolynda barlyq jaǵdaılardy jasaýymyz kerek. Biz elordamyzdy dúnıe júziniń eń kórikti qalalarynyń, álemdegi ómir súrýge eń qolaıly qalalardyń birine aınaldyrýymyz kerek, dedi Memleket basshysy óz sózinde.
Odan ári Elbasy osy 16 jyl ishinde táýelsiz elimizdiń jańa Astanasyn salý maqsatynda orasan zor jumys atqarylǵandyǵyn atap kórsetti. Astanany búginde álemdegi asa serpindi damyp kele jatqan qala dep esepteımiz. Muny tek biz ǵana emes, álemniń kóptegen sarapshylary moıyndaıdy. Biz ózimizdiń táýelsiz memleketimiz úshin osyndaı elorda salǵanymyzǵa maqtanamyz. Jetken jetistikter úlken. Sonymen birge biz qazir budan da joǵary mejelerdi belgilep, Astanamyzdy ómir súrýge eń qolaıly qalalardyń birine aınaldyrý jolynda mindetter qoıyp otyrmyz. Bul rette bizdiń qalamyzben barlyq jaǵynan, aýa raıy, tabıǵaty jaǵynan da uqsas qalalardy úlgi tutýymyz kerek. Máselen, Kanada eliniń qalalarymen, sonymen birge, Sıngapýr sııaqty bizdiń qalamyzben uqsas jaǵdaılary bar qalalarmen deńgeılesýimiz kerek.
Odan ári Memleket basshysy qala ekonomıkasyna toqtaldy. Qaladaǵy óndiris ónerkásibiniń kólemi 260 mıllıard teńgege jetip, 7 paıyzǵa ósti. Ekonomıkaǵa 545 mıllıard teńge ınvestısııa salyndy. Bul jaqsy kórsetkish. Búginde qalada shaǵyn jáne orta bıznes qarqyndy damyp keledi. Shaǵyn jáne orta bıznes sýbektileri óndiretin ónimder jalpy óńirlik ónimniń 40 paıyzyn quraıdy. Shaǵyn kásipkerlikke jumysqa qabiletti qala turǵyndarynyń basym kópshiligi qatysyp, jergilikti bıýdjetke túsetin tabystyń 70 paıyzyn beredi. Bul búkil Qazaqstanǵa úlgi bolarlyq jaqsy kórsetkish. О́tken jyly qalada 1 mıllıon 100 myń sharshy metr turǵyn úı paıdalanýǵa berildi. 4 mektep, 8 balalar baqshasy jáne birqatar densaýlyq saqtaý mekemeleri salyndy, dedi Prezıdent.
О́ziniń saltanaty jarasqan erekshe nysandarynyń nátıjesinde elorda iri mádenıet, saýda jáne týrıstik ortalyqqa aınaldy. Sońǵy jyly Astanaǵa 1 mıllıonnan astam týrıster, onyń ishinde 100 myńnan astam shetel týrısteri kelgen. Taıaý jyldar aralyǵynda atqarylatyn mindetter sanatynda qalanyń aldynda turǵan eń joǵary da jaýapty mindet – EKSPO-2017 halyqaralyq kórmesin joǵary dárejede ótkizý bolyp tabylady. Bul qalamyzdyń damýyna jańa serpin beredi. Elordamyzda sapalyq deńgeıi asa joǵary jańa ortalyq salynady. Biz EKSPO qalashyǵyn salyp qana qoımaımyz, biz bolashaqqa baǵdar alǵan qurylys nysandaryn salamyz. Kórme qalashyǵynda tek «jasyl ekonomıkaǵa» ǵana qatysty emes, sonymen birge, ozyq tehnologııaǵa jaýap beretin ınnovasııalyq jobalar júzege asyrylatyn bolady. Ýaqyt az, atqaratyn jumys aýqymy zor. Sondyqtan barynsha jumylyp eńbek etýimiz kerek, dedi Memleket basshysy. Sodan keıin Elbasy baıandama jasaý úshin sóz kezegin qala ákimi Imanǵalı Tasmaǵambetovke berdi.
– Búgin Astananyń damýy barysy jaıyndaǵy dástúrli keńeste júzdesip otyrmyz, dedi baıandamashy. О́tken keńesten bergi aralyqta atqarylǵan jumystyń nátıjeleri jaman emes. Jalpy alǵanda, 2008 jyldan beri elordamyzdy damytý maqsatynda Sizdiń tarapyńyzdan 323 hattamalyq tapsyrmalar berildi. Onyń 243-i tolyq oryndaldy. 80 tapsyrmańyz is júzine asyrylý ústinde, al 38 tapsyrma Úkimetpen birigip júzege asyrylýda.
2013 jyly qalanyń jalpy óńirlik óniminiń kólemi 2,7 trıllıon teńgege jetip, jan basyna shaqqandaǵy bul kórsetkish 23 myń AQSh dollaryn qurady. О́tken jyly ónerkásip óniminiń kólemi 6,7 paıyzǵa ósip, 263,2 mıllıard teńgeni qurady. Qazirgi tańda elordanyń ekonomıkalyq negizin shaǵyn jáne orta bıznes sektory quraıdy. Olar jalpy óńirlik ónimniń 60 paıyzyn óndiredi. О́tken jyly qaladaǵy shaǵyn jáne orta bıznes sýbektileri 1 trıllıon 200 mıllıard teńgeniń ónimin óndirdi. Búginde shaǵyn jáne orta bıznes salasynda ekonomıkalyq turǵydan belsendi qala turǵyndarynyń 77 paıyzy, ıaǵnı 316 myń adam eńbek etedi. Kelesi jyldan bastap elorda respýblıkalyq bıýdjetke 7,5 mıllıard teńge, al 2016 jyldan bastap 17,3 mıllıard teńge qarjy aýdaratyn bolady. Iаǵnı Astana qalasy respýblıkalyq bıýdjettiń donory bolyp sanalatyn aldyńǵy qatarly 4 óńirdiń quramyna kiredi.
Odan ári qala ákimi elordanyń ekonomıkalyq damýy barysynda ınnovasııalyq ındýstrııalandyrý baǵytyna erekshe basymdyq berilip otyrǵandyǵyn tilge tıek etti. Bul maqsatty júzege asyrý barysynda qalada jumys istep turǵan Indýstrııalyq parktiń qosqan úlesi zor.
Búginde Indýstrııalyq parkter aýmaǵynda jalpy quny 180 mıllıard teńgeni quraıtyn 49 joba is júzine asyrylýda. Osynda júzege asyrylǵan 19 joba búginde oıdaǵydaı jumys istep tur. 2014 jyldyń aıaǵyna deıin taǵy da 4 iri kásiporyn iske qosylmaq. Jalpy alǵanda, Indýstrııalyq parkte josparlanǵan barlyq kásiporyndar 2016 jyldyń sońyna deıin tolyq iske qosylatyn bolady.
«Qoljetimdi baspana-2020» baǵdarlamasy sheńberinde 2013 jyly 3 turǵyn úı kesheni paıdalanýǵa berildi. Qazirgi kezde 4 myńnan astam páterden turatyn 11 kóp páterli turǵyn úı kesheniniń qurylysy salynyp jatyr. Onyń ishinde 8 turǵyn úı kesheni aǵymdaǵy jyly aıaqtalady. Al kóp páterli 3 turǵyn úı kesheni 2015 jyly paıdalanýǵa beriledi. Qazir negizinen qurylys jumystary Bas jospar aıasyndaǵy basymdyq berilgen bes baǵyt boıynsha júrgizilýde. 2013 jyly 4 orta mektep paıdalanýǵa berilse, ústimizdegi jyly 9 jańa mektep qurylysy salynbaq. Bıyl qurylys mamandaryn daıarlaıtyn 800 oryndyq 1 kolledj paıdalanýǵa berilip, energetıka salasynyń mamandaryn daıarlaıtyn 800 oryndyq taǵy bir kolledjdiń qurylysy bastalmaq. 2012-2013 jyldarda qalamyzda 2 aýrýhana jáne 2 emhana paıdalanýǵa berildi. 2014 jyly sol jaǵalaýda bir aýysymda 500 adam qabyldaıtyn ambýlatorııalyq emhanalyq keshen, sonymen birge, Ilınka kentinde 2 emhana, Dosmuhamedov atyndaǵy kóshede 1 emhana paıdalanýǵa beriledi. Sóıtip, qala turǵyndaryna emhanalyq qyzmet kórsetý tolyq dárejesinde sheshim tabady.
Odan ári baıandamashy elordany azyq-túlikpen qamtamasyz etý máselesine toqtaldy. Qazir qalaǵa 60 myń tonna kóleminde kókónis ónimderin saqtaıtyn qoıma oryndary qajet. О́tken jyly 3 qoıma qurylysy salyndy. Qazir qala boıynsha 22 myń tonna kókónis ónimderin saqtaıtyn qoımalar bar. Bıylǵy jyly jalpy kólemi 11 myń tonna kókónis saqtaýǵa arnalǵan 3 qoıma paıdalanýǵa beriledi jáne jalpy kólemi 13 myń tonna kókónis saqtaýǵa arnalǵan 3 qoımanyń qurylysy bastalmaq. 2016 jyly qala suranysyn tolyq qanaǵattandyrý mejesine qol jetkizilmek. Búgingi kúni qalada jalpy qýaty 2,5 myń tonna kókónis ósirýge negizdelgen 2 jylyjaı jumys istese, jalpy qýaty jylyna 6,9 myń tonna kókónis ósirýge negizdelgen 3 jylyjaı qurylysy salynýda.
Baıandamashy Elbasynyń tikeleı tapsyrmasy boıynsha qalany kógaldandyrý jáne abattandyrý maqsatynda atqarylyp jatqan jumysqa da jan-jaqty toqtalyp ótti. 2013 jyly qalada jalpy kólemi 6 gektardy quraıtyn 12 skver jasaqtalǵan. Ústimizdegi jyly qalada 13 skver jáne 2 saıabaq qurylysy salynady jáne kúrdeli jóndeýden ótkiziledi. Bıylǵy jyly Ortalyq saıabaqty qaıta qurý jumysy tolyǵymen aıaqtalady. Sonymen birge, bıyl Esil ózeniniń jaǵasyndaǵy jalpy kólemi 190 gektar bolatyn saıabaq qurylysy aıaqtalady. Saıabaqta qajetti barlyq ınfraqurylymdarmen birge 15 myńnan astam aǵash búrshik jaratyn bolady. Sol sııaqty Botanıkalyq baq iske qosylatyn bolady.
Aldaǵy ýaqytta qalada atqarylatyn mindetterdiń ishindegi eń mańyzdysy qoǵamdyq kólik salasyn damytý bolyp tabylady. Búgingi tańda qalaǵa qajetti avtobýstar sany 900 bolsa, onyń ishinde 350 avtobýs jetispeıdi. Bıylǵy jyly 350 jańa avtobýs satyp alynbaq. Sóıtip, qalaǵa qajetti avtobýs kóligi tolyq qamtamasyz etiledi. Elordada bıylǵy jyly 2 kommýnaldyq avtobýs parkiniń qurylysyn bastaý josparlanyp otyr. Ol úshin Indýstrııalyq park aýmaǵynda 8,5 gektar jer telimi bólindi. Alǵashqy joba boıynsha qurylys mamyr aıynda bastalyp, ústimizdegi jyldyń qazan aıynda aıaqtalmaq. Al ekinshi kommýnaldyq park qurylysy 2014 jyldyń ekinshi jartyjyldyǵynda bastalmaq. Sonymen birge, Astanada jańa temirjol vokzalynyń qurylysy bastalmaq. Bolashaqta qalada 2 jańa avtovokzal boı kóteredi. Búginde bul iri jobalardyń daıyndyq jumystary aıaqtaldy, jer telimderi bólindi. Qurylys jumystary 2015 jyldyń birinshi toqsanynda bastalady.
Baıandamashy Astana qalasyndaǵy jalpy uzyndyǵy 35 shaqyrymdy quraıtyn Kishi kólik saqınasynyń qurylysy qarqyndy júrgizilip jatqandyǵyn atap kórsetti. Onyń 20 shaqyrymy paıdalanýǵa berildi. Bul joba aıasynda sonymen birge, 18 jol aıryǵy jáne kópir qurylystary salyndy. Kishi kólik saqınasynyń qurylysy 2016 jyly tolyq aıaqtalady. Sonyń nátıjesinde 20 myń avtokólik qalanyń ortalyǵyn aınalyp ótýge múmkindik alady. 2013 jyly Saryarqa dańǵyly boıynsha Esil ózeni arqyly ótetin kópirdi jáne M-2 kópirin kúrdeli jóndeý jumystary júrgizildi. Bıylǵy jyly taǵy da 2 iri kópirdi kúrdeli jóndeýden ótkizý kózdelýde. Qala boıynsha jalpy uzyndyǵy 120 shaqyrym jańa jol qurylysy salynady jáne kúrdeli jóndeýden ótkiziledi. Sonymen birge, baıandamashy qalanyń aldynda turǵan eń mańyzdy mindetterdiń biri retinde EKSPO-2017 Halyqaralyq kórmesin ótkizýge daıyndyq jumystary ekendigin atap kórsetip, osy oraıda atqarylyp jatqan jumystardy tilge tıek etti.
«TMD elderinde alǵash ret ótetin EKSPO-2017 kórmesi – Qazaqstannyń negizgi jobalarynyń biri. Osy oraıda Sizdiń elimizdiń júregi bolyp tabylatyn Astanada tarıhı mańyzdaǵy álemdik is-sharany ótkizý týraly bastamańyz júzege asyryla bastady. Siz atap ótkendeı, kórme Qazaqstan ekonomıkasynda jańa kezeń bolyp, ınnovasııalyq tehnologııalar men ındýstrııalyq revolıýsııanyń jańa alańyna aınaldy», – dedi odan ári sóz alǵan «Astana EKSPO-2017» UK» AQ basqarma tóraǵasy Talǵat Ermegııaev. Tóraǵanyń aıtýy boıynsha, Tirkeý qujaty kórme nysandarynyń barlyq tehnıkalyq qujattaryn qamtıtyn basty jospar bolyp sanalady. Jaqynda Parıj qalasynda qazaqstandyq delegasııa Halyqaralyq kórmeler bıýrosynyń (HKB) Atqarýshy komıteti otyrysynda EKSPO-2017-niń tirkeý qujattary boıynsha esep berdi. Atqarýshy komıtettiń músheleri EKSPO-2017 kórmesiniń Tirkeý qujatyn biraýyzdan qoldap, ústimizdegi jylǵy 11 maýsymda Parıjde ótetin HKB-niń 155-shi Bas Assambleıasynyń maquldanýyna usynýǵa sheshim qabyldady.
Maýsymda «Qazaqstan» ulttyq pavılony qurylysyna kirisemiz. Eki aıdan keıin halyqaralyq taqyryptyq korporatıvtik pavılondardyń qurylysy boıynsha jumystar bastalady. Tamyzda uıymdastyrýshy keńsesin, al qyrkúıekte turǵyn úı keshenderi qurylysyn qolǵa alamyz. Tolyqtaı alǵanda, aǵymdaǵy jyldyń jeltoqsanynda 25 gektardaǵy kórme aımaǵynyń nóldik sıklin aıaqtaımyz, dedi óz sózinde Talǵat Ermegııaev.
Elordany odan ári damytýǵa baılanysty ótken keńeste sóılegen sózinde Prezıdent sońǵy bes jyl ishinde Astana qalasynan memlekettik bıýdjetke túsken túsimder eki ese artyp, 60 mıllıard teńgeni qurap otyrǵandyǵyn atap kórsetti.
Kelesi jyldan bastap elorda el bıýdjetiniń nárlendirýshisi bolady. О́ndirilgen ónim kólemin, aktıvter qunyn eseptegende Astana qazirdiń ózinde memleket tarapynan salynǵan shyǵyndy tolyq aqtady. Biz Qazaqstannyń ulttyq baılyǵyna qarqyndy damýyn barǵan saıyn jalǵastyryp otyrǵan tutas bir qalany qostyq, dedi Memleket basshysy. Odan ári Nursultan Nazarbaev qala ekonomıkasyna salynǵan ınvestısııanyń jartysyna jýyǵyn jekemenshik kapıtaldyń úlesi quraıtyndyǵyn atap kórsetti.
Solaı bola tursa da, shetel kapıtalyn tartý jónindegi jumys joǵary dárejede júrgizilmeı otyr. 2013 jyly ınvestısııanyń jalpy kólemi 540 mıllıard teńgege jetken, onyń ishinde shetel ınvestısııasy bar bolǵany 1,4 mıllıard teńgeni nemese 0,2 paıyzdy qurady. Bizde Investorlarǵa qyzmet kórsetetin ortalyq, Arnaıy ekonomıkalyq aımaq qurylǵan. Alaıda, shetel ınvestısııalaryn tartý salasyndaǵy nátıje oıdaǵydaı emes. Bizdiń qalamyzǵa kóptegen elderdiń qyzyǵýshylyǵy bar, kópshiligi qarjy salǵysy keledi, biraq, olar kóptegen kedergilerge tap bolady. Qalada barlyq qyzmet túrlerin elektrondy formatqa kóshirý jóninde jumys júrgizilýde. Bul shetel ınvestorlaryna da qatysty bolýy kerek, olarǵa «bir tereze» qaǵıdaty boıynsha qyzmet kórsetilýi kerek, dedi Elbasy.
Memleket basshysy mańyzdy ekonomıkalyq aktıv bolyp sanalatyn astanalyq jer telimderin paıdalanýdyń tıimdiligin arttyrý qajettigin atap kórsetti.
Bas prokýratýranyń deregi boıynsha, qalada jalpy kólemi 15 myń gektardy quraıtyn 800-den astam jer telimi ıgerilmeı jatyr. Olardy qaıtaryp alý jáne bul jerlerdi qurylys jumystaryn júrgizýge yntaly ınvestorlarǵa berý jónindegi jumysty odan ári jalǵastyrý kerek. Bas prokýratýra ıgerilmegen jer telimderi boıynsha jasalǵan is-sharalardyń barlyǵy boıynsha tekseris jumystaryn júrgizýi tıis. Qajet bolǵan jaǵdaıda ıgerilmegen mundaı jerlerdi qaıtyp alý jónindegi qujat berilgennen keıin ony satýǵa jáne syılaýǵa tyıym salý jóninde zańnamaǵa ózgeris engizilýi kerek, dedi Nursultan Nazarbaev.
Sonymen birge, Prezıdent Astanany damytýǵa bólingen qarjyny paıdalanýdyń tıimdiligine basa nazar aýdardy. О́tken jyly qala bıýdjetinen tek ákimdikke qarasty uıymdarǵa 85 mıllıard teńge, ıaǵnı qala bıýdjetiniń tórtten birin quraıtyn qarjy bólingen. Al bul uıymdardyń 32-si shyǵynmen jumys istese, 8-i bankrottyq jaǵdaıǵa jetken. Men bul problema týraly jyl saıyn aıtamyn, alaıda shyǵyndy ońtaılandyrý, mundaı kásiporyndardy azaıtý barysynda eshqandaı jumys júrgizilmeı keledi. Qalyptasqan osyndaı ahýal barlyǵyn qanaǵattandyryp otyr. Bul máseleni sheshýmen shuǵyl aınalysý kerek, dedi Memleket basshysy. Nursultan Nazarbaev sońǵy jyldary qalalyq aýdandardyń arhıtektýralyq-qala qurylysy jáne ınfraqurylymy arasynda aıyrmashylyqtardyń údep bara jatqandyǵy týraly da atap kórsetti.
Máselen, qalanyń ońtústik-batys bóligindegi áleýmettik nysandar ınfraqurylymynyń jaǵdaıy ortalyqtaǵy jaǵdaıdan múldem basqasha. Is júzinde áleýmettik keskini múlde basqa oramdar salynýda. Qalanyń shetkeri aımaqtary keleńsiz jaǵdaıda bolýǵa tıis emes. Olardyń tarapyna biryńǵaı kózqaras qalyptasyp, olar da qala quramynda damýy kerek, dedi Prezıdent.
Sondaı-aq, Memleket basshysy qalalyq bazarlardyń usqynsyz kelbeti, antısanıtarlyq jaǵdaıy jáne salyq tólemeýi faktilerine jol berýge bolmaıtyndyǵyn atap kórsetti. Olardyń barlyq talaptardy oryndaýy qajettigin tapsyrdy. Elbasy qalany sý tasqynynan qorǵaý, sýmen qamtamasyz etý, №3 JEO qurylysyna baqylaý jasaýdy kúsheıtý arqyly jylýmen qamtamasyz etý máselelerindegi problemalardy sheshý qajettigin atap aıtty. Úsh jyl ishinde qalada 330 shaqyrym jol jóndeldi. Osyǵan baılanysty Memleket basshysy jol qurylysy sapasynyń tómendigine jáne sapany túbegeıli jaqsartý qajettigine nazar aýdardy.
Nursultan Nazarbaev óz sózinde elordada Qazaqstan boıynsha eń joǵary qylmys deńgeıi tirkelip otyrǵandyǵyn atap ótti. О́tken jyly qylmys sany 53 paıyzǵa, onyń ishinde aýyr qylmys eki ese ósken. Al qylmysty ashý deńgeıi 36 paıyzdy qurap otyr. Qala baqylaý pýnktterin qalyptastyrý úshin 2 mıllıard teńge qarjy jumsaǵan, alaıda olardyń esebinen qylmysty ashý deńgeıi bar bolǵany 1 paıyzdy quraǵan. Osyǵan baılanysty Prezıdent Astanany qala turǵyndary úshin qaýipsiz qalaǵa aınaldyrý týraly mindet qoıdy. Memleket basshysy qalada bar mádenıet nysandaryn paıdalaný máselesine nazar aýdardy. Bul mádenıet ortalyqtarynda qala kelbeti qalyptasady, turǵyndardy ádemilikke, ónerge, mýzykaǵa baýlý sharalary júzege asyrylady. Bıýdjet esebinen salynǵan áleýmettik nysandar únemi sol bıýdjetke táýeldiliginen shyǵa almaıdy. Olar barynsha tıimdi paıdalanylýy qajet jáne tym bolmaǵanda ózderiniń qalypty jumysyn qamtamasyz etýge jetetin tabys tabýy kerek, dedi Elbasy.
Elbasy 120 memleket jáne kóptegen halyqaralyq uıymdardyń qatysýy josparlanyp otyrǵan EKSPO-2017 kórmesin oıdaǵydaı ótkizý Astana qalasynyń jáne jalpy elimizdiń aldynda turǵan eń mańyzdy mindetterdiń biri ekenin atap kórsetti. Ol Astana qalasynyń jáne alda turǵan EKSPO-2017 búkilálemdik kórmesiniń tanymaldylyǵyn arttyrý qajettigine nazar aýdardy. Sóziniń qorytyndysynda Nursultan Nazarbaev elordanyń aldynda álemniń jetekshi qalalarymen básekege túsý maqsaty turǵandyǵyn atap kórsetti. Álemde qalalardy ártúrli dárejede baǵalaý qalyptasqan, básekelestikke qabilettilik ındeksi, ómir súrý jaǵdaıy jáne qolaılylyǵy úshin, ómir súrý sapasy boıynsha baǵalaý reıtıngteri bar. Biz osyndaı reıtıngtik kórsetkishterdi jaqsartýǵa umtylýymyz kerek. Turǵyndar ózderiniń qalasyn súıýi jáne onda salynǵan barlyq ǵımarattardy kózdiń qarashyǵyndaı saqtaýy kerek. Bizdiń elimizdiń 2050 jylǵa deıingi damý strategııasynda Qazaqstannyń álemdegi eń damyǵan 30 eldiń quramyna kirý týraly maqsaty aıqyndalǵan. Sondyqtan Astana qalasynyń aldyna asa joǵary mindet – 2050 jyly álemdegi eń damyǵan 10 qalanyń quramyna kirý mindeti qoıylyp otyr, dedi Elbasy.
Keńeste kóterilgen barlyq máseleler boıynsha ortalyq jáne jergilikti atqarýshy organdardyń, onyń ishinde ókiletti qalalyq qyzmet oryndarynyń basshylary tıisti túsinik berdi.
Jylqybaı JAǴYPARULY,
«Egemen Qazaqstan».
-----------------------------------------
Sýretterdi túsirgender
S.BONDARENKO, B.OTARBAEV.
