Qazaqstan • 30 Maýsym, 2022

Qos jobany qaıta qaraý qajet

31 ret kórsetildi

Aýyldyq jerlerde jumys oryndaryn ashyp qana qoımaı, jas mamandardy tartý úshin sapaly materıaldyq-tehnıkalyq baza, áleýmettik jáne ınjenerlik ınfraqurylym qurylýy tıis. «Aýyl – el besigi» jáne «Dıplommen – aýylǵa!» jobalarynyń júzege asyrylý barysy talqylanǵan Amanat partııalyq baqylaý komıtetiniń kezekti otyrysynda osyndaı usynys aıtyldy.

Komıtettiń málimetinshe, «Dıp­lom­men – aýylǵa!» jobasy iske qo­sylǵan 12 jyldyń ishinde 85 myńnan astam maman 14,1 mlrd teńge kóleminde jár­dem­aqy alǵan. Al 40 myńnan astam ma­manǵa turǵyn úı satyp alý úshin 123,5 mlrd teńge kóle­minde nesıe berilgen.

«Jergilikti jerlerde densaýlyq saq­taý, agroónerkásiptik keshen sala­syn­­daǵy mamandar men ákim apparaty qyzmetker­leriniń jetispeýshiligi baı­qa­lady. Ekolog, aspaz, dánekerleýshi, mehanızator bir sóz­ben aıtqanda, kásip­tik-tehnıkalyq bili­mi bar ma­mandar qajet. Alaıda, olar jo­ba­nyń tizimine kirmeıdi. 2020 jy­ly aýyl, kent, aýyl­dyq okrýg áki­mi apparatynyń mem­­lekettik qyz­met­shileri tizimge kirdi. Alaıda olar aýdan ákimdiginiń ma­man­dary týraly umytyp ketken kórinedi», dedi komı­tet múshesi, Májilis depýtaty Mádı Ahmetov.

Depýtat «Dıplommen – aýyl­ǵa!» jo­basyna qatyspaıtyn monoqa­lalarǵa da toqtaldy. Ol oblys orta­lyq­tarynan 500 shaqyrymnan astam qashyqtyqta ornalasqan Derjavınsk jáne Mam­lıýt­ka qalalaryndaǵy jaǵdaıdy mysalǵa keltirdi.

«Bul qalalarda «Dıplommen – aýyl­ǵa!» jobasyna qatysýǵa múm­kindik joq. Jas mamandarǵa kóterme jár­dem­aqy tólenbeıdi jáne turǵyn úıge bıýd­jet­tik nesıeler berilmeıdi. Son­daı-aq jal­aqy jaqyn mańdaǵy aýyl­men sa­lystyrǵanda 25 paıyz­ǵa az. Osy­laı­sha azamattardyń teń múmkindik­te­ri qa­ǵı­daty joǵa­lady», dedi Mádı Ahmetov.

Sonymen qatar Partııalyq ba­qy­l­aý komıtetiniń jumys toby 2020-2022 jyl­dary «Aýyl – el besigi» jobasynyń iske asyrylýyna monıtorıng júrgizý maq­satynda Soltústik Qazaqstan jáne Aqmola oblystarynda tekserý júrgizdi.

Soltústik Qazaqstan oblysyndaǵy 63 aýylda 102 jobany júzege asy­rýǵa 15,2 mlrd teńge bólingen. Eki jylda 34 bilim berý, 10 densaýlyq, 9 mádenıet nysany jáne 35 aýyl­da 226 shaqyrymnan astam ishki jol jóndelgen. Bul rette birqatar túıtkildi másele bar. Máselen Afon­kıno aýylynda mektepke júr­gizilgen kúrdeli jóndeý jumystary ke­zinde kóp kemshilikter bolǵan.

Aqmola oblysynda 41 jobany júzege asyrýǵa 7,2 mlrd teńge bólin­gen. Alaıda kesteden qalyp qoıýyna baılanysty San­dyqtaý aýylyndaǵy mektep pen aýdandyq aýrýhana ǵımara­tyn kúrdeli jóndeýden ótkizýge jáne Aqmol aýylynda dene shynyq­tyrý saýyq­tyrý keshenin salýǵa bólingen qarajat ıgerilmeı qalǵan.

Ulttyq ekonomıka vıse-mınıstri Baýyrjan Omarbekovtiń aıtýynsha, bıyl 576 aýylda jobalardy iske asyrý­ǵa respýblıkalyq bıýdjetten 127,9 mlrd teńge bólingen. «Qazirgi ýa­qytta tujyrymdamalyq sheshimdi qa­jet etetin birqatar másele bar. Búginde tıisti vedomstvoaralyq úılestirý ju­mystary joq. Aýyldy damytý jó­nin­degi is-sharalar birneshe ulttyq joba sheń­berinde iske asyrylady jáne jaýapty memlekettik organdardyń quzy­retin tıisti úılestirýsiz, júıelen­dir­meı eldi mekenderdiń ómiri men eko­nomıkalyq belsendiliginiń ár túr­­li aspektilerine baǵyttalǵan. Budan bas­qa, bıýdjettik qarjylandyrý úshin jo­ba­lar­dy irikteý tetigi rettelmegen. Joba­­lar­dy irikteýdi negizinen jergi­lik­ti atqa­rý­shy organdar derbes, keıde qarjy­lan­dy­rý baǵyt­tary boıyn­sha tıisti basym­dyq­syz júzege asy­ra­dy. Sonymen qatar qolda­nystaǵy aı­maq­tyq standarttar júıesi­niń for­ma­­tyn sapaly etip jańartý qajet», dedi ol.

Partııalyq baqylaý komıtetiniń tór­aǵasy Artýr Platonovtyń aı­týyn­sha, «Aýyl – el besigi» jáne «Dıp­­lom­men – aýyl­ǵa!» jobalary boıyn­sha aqparattyq qam­tamasyz etý ju­mys­­tary mardymsyz. Ol bul olqy­lyq­tardy tú­zetetin ýaqyt jetkenin aıtty.

«Árbir eldi mekenniń jáne árbir naqty qatysýshynyń jeke erek­she­lik­terin eskerý qajet. Jas mamandar úshin qajetti sapaly áleý­mettik ınfra­qurylym joq. Kópte­gen qurylys ju­my­sy sapasyz, stan­dart­tarǵa saı oryn­dalmaǵan. Tek aqsha qurtý sııaq­ty. Bul júıeli for­ma­lızmniń jáne mem­le­kettik baǵ­dar­lamalardyń bedelin tú­sirý­diń kórinisi», dep túıindedi Artýr Platonov.

Sońǵy jańalyqtar

Búgin 3 qalada aýa sapasy nasharlaıdy

Aýa raıy • Búgin, 09:38

Uqsas jańalyqtar