Iýlııa Pýtınseva (32) fransııalyq Alıze Kornemen (38) kezdesti. Álemdik reıtıngte ekeýi shamamen qatar tur. Desek te Kornege kelgende Pýtınsevanyń bilgeninen jańylatyn bir jaman ádeti bar. Olar ózara úsh ret kezdesip, úsheýinde de Fransııa ókiliniń mereıi ústem boldy. Al 2017 jyly Nıý-Heıvendegi týrnırde jerlesimiz qarsylasynan 0:6, 0:6 esebimen oısyraı utylǵan edi. Bul joly da Iýlııa Alızeden aılasyn asyra almady – 3:6, 6:7. Elena Rybakına (23) amerıkalyq Koko Vandevegemen (157) sheberlik baıqasty. Kezinde Vandevege eki ret «Ýımbldonnyń» shırek fınalyna deıin jetip, AQSh pen Aýstarlııanyń ashyq birinshiliginiń jartylaı fınalynda oınady. Dáýiri júrip turǵan kezde WTA reıtınginde TOP-10 tennısshiniń qataryna endi. Biraq qazirgi kezde Kokonyń qarqyny báseńdegen. 1 saǵat 41 mınýtqa sozylǵan bul báseke 7:6, 7:5 esebimen Rybakınanyń paıdasyna sheshildi.
