Eń bastysy – eńbek qaýipsizdigi

«Samuryq-Qazyna» AQ basqarma tór­aǵasy Almasadam Sátqalıev atap ótken­deı, forýmdy uıymdastyrýdaǵy basty maqsat – eńbek qaýipsizdigi jáne ony qorǵaý salasynda jańa iri saraptama alańyn qurý, saladaǵy túıtkildi máselelerdiń túıinin tarqatý, aýqymdy taldaý júrgizý hám ózara tájirıbe almasý.

A.Sátqalıev búgingi tańda Qor tobynda eńbekti qorǵaý jáne óndiristik qaýipsizdik baǵy­ty boıynsha júrgizilip jatqan jumys nátı­jelerimen bólisti. Sondaı-aq 2022-2026 jyldarǵa arnalǵan syn-tegeýrinder týraly áńgimeledi.

– «Samuryq-Qazyna» – Qazaqstandaǵy eń iri jumys berýshi. Kompanııalar tobyndaǵy qyz­metkerlerdiń sany 250 myńnan astam adam­dy quraıdy. Bul rette óndiristik perso­naldyń úlesi jalpy qyzmetkerler sanynyń 92,4 paıyzyn quraıdy. Atap óterligi, Qor kóptegen jyl boıy qaýipsiz óndiris qun­dylyqtary men tásilderin ilgeriletýge kúsh-jiger men resýrstar bólip keledi. Degen­men biz óz kásiporyndarymyzda nól­dik jara­qattanýǵa qol jetkizý boıynsha maq­satty kórsetkishterden áli de alyspyz. Jyl qorytyndysy boıynsha tıisti kom­pa­nııa­lardyń Dırektorlar keńesi­niń al­dyna óndiristik qaýipsizdik salasyn­da birin­shi basshylardyń júrgizgen jumy­sy tý­raly suraıtyn bolamyz. Kásiporyn qyzmet­kerleriniń qaýipsizdigin qamta­masyz etý men jalpy Qor úshin basty qundylyq bolyp sanalady jáne árbir jazataıym oqıǵany erekshe baqylaýda ustaı­ty­nymdy eskertkim keledi, – dedi forýmnyń ashylýynda Almasadam Sátqalıev.

Qordyń basqarma tóraǵasy eńbekti qorǵaý jáne óndiristik qaýipsizdik baǵytyn­daǵy jumysty odan ári jetildirý úshin naqty tapsyrmalar berdi.

– Qyzmetkerlerdiń densaýlyǵy men qaýipsizdigine qatysty dúnıeniń bári bizdiń jiti nazarymyzda bolady. Osy baǵyttaǵy jumysty odan ári jalǵastyrý mańyzdy. Bul rette aldaǵy is-áreketterimizdi aıqyndap alý úshin naqty tapsyrmalar bermekpin. Enshi­les kompanııalardyń basshylary búgin qol qoıylǵan mindettemelerdi barlyq deń­geı­de ustanýy kerek. Sondaı-aq osyǵan uqsas mindettemeler kompanııalardyń óz ishinde de jasalýǵa tıis. О́ndiristik apattarǵa ákep soq­ty­ratyn táýekelderge taldaý júr­gizý kerek. Olardyń aldyn alý úshin júıeli túrde nazarda ustalatyn usynymdar berilýge tıis, – dedi «Samuryq-Qazyna» AQ basqarma tóraǵasy.

Almasadam Sátqalıev óndiristik qaýip­siz­dik komıteti alańynda qaýipsizdikti saqtaý tur­ǵysynan ózara tájirıbe almasý mańyzdy eke­nin, bul ozyq tájirıbelerdi enshiles kom­pa­nııa­larǵa engizip, taratý úshin kerektigin jetkizdi.

– Ozyq tájirıbelerge súıene otyryp, úderisterdi sıfrlandyrý baǵytyndaǵy jumys­tardy qoldap, jalǵastyrý qajet. О́ndiristegi qaýipsizdikti tıimdi qamtama­syz etý úshin barlyq deńgeıde aýdıt júr­gizilýge tıis. Eńbek qaýipsizdigi máde­nıe­tin qalyptastyrý úshin biryńǵaı korpo­ratıvtik oqytý kýrs uıymdastyrý ma­ńyzdy. Basshylardyń qorshaǵan ortany qorǵaý jáne óndiristik qaýipsizdik baǵytyndaǵy jumystaryn ádil baǵalaý úshin tıisti krıterıılerdi anyqtap, bekitý kerek. Atap óterligi, qordyń nazaryndaǵy talaptardyń bári bizdiń kontragentterde de qatań saqtalýy tıis, – dedi A.Sátqalıev.

Kez kelgen kompanııa úshin eńbek qaýip­siz­digin saqtaý – mańyzdy baǵyt. Sondyq­tan olar bul saladaǵy jumysty jetildirip otyrýǵa beıildi. Máselen, «QazMunaıGaz» ulttyq kompanııasynda da bul baǵytta atqarylǵan jumys aýqymdy. Bul týraly forýmda ulttyq kompanııanyń qorshaǵan ortany qorǵaý departamentiniń dırektory Qaırat Saqtaǵanov aıtyp berdi.

– «QazMunaıGaz» úshin qyzmetkerlerdiń ómiri men densaýlyǵy basym baǵyt sanalady. Bul rette kompanııa nóldik jaraqattaný qaǵı­datyn qatań ustanady. Biz eńbek qaýip­sizdigi mádenıetin qalyptastyryp, nyǵaıtýǵa kúsh salyp kelemiz. Osy jyldyń naýryz aıynda qor­shaǵan ortany qorǵaý baǵytyndaǵy qolda­nystaǵy marketıngti jetildirý maqsatynda ulttyq kompanııa resmı túrde Vision Zero jahandyq bastamasyna qosyldy. Bul bastama «QazMunaıGazǵa» qarasty kompanııalardyń bárine engiziledi, – dedi Q.Saqtaǵanov.

Forým barysynda memlekettik organ­dar­dyń ókilderi, «Samuryq-Qazyna» tobyna qarasty óndiristik kompanııalardyń, halyqaralyq uıymdardyń top-mened­jerleri jáne táýelsiz sarapshylar oılaryn ortaǵa salyp, pikirlerimen bólisti. Forým­nyń basty artyqshylyǵy da osynda jatsa kerek.

Sonymen qatar forým aıasynda Qor tobynyń 13 iri kompanııasynyń top-mened­jer­leri Health&Safety salasynda jeke mindet­temelerge qol qoıdy. Basshy­lar ózderi úlgi bola otyryp, qaýipsiz­dik qun­dylyqtaryna degen adaldyǵyn kórse­týge, kompanııalarda eńbek­ti qorǵaý sa­lasynda ozyq tájirıbeni engizý­­di qamtamasyz etýge, sondaı-aq qyzmet­ker­ler úshin qaýipsiz jumys jaǵdaıyn jasaý­ǵa mindetteldi. Tıisti min­dettemege «QazMunaıGaz» UK» AQ, «Qaz­atomónerkásip» UAK» AQ, «Qazaqstan temir joly» UK» AQ, «QazaqGaz» AQ, «KEGOC» AQ, «Samuryq-Energo» AQ, «Qa­zaq­telekom» AQ, «Qazposhta» AQ, «Eır Astana» AQ, «Qazaq Air» AQ, «Taý-Ken Sa­mu­ryq» UTK» AQ, «Samruk-Kazyna Ondeu» JShS, «Samruk-Kazyna Constraction» AQ sııaq­­ty kompanııalardyń basshylary otyrdy.

Forým jumysyna halyqaralyq uıymdar men kompanııalardyń ókilderi qatysyp, eńbekti qorǵaý salasyndaǵy álemdik jetistiktermen bólisti. Forým spıkerleri arasynda ORP (Halyqaralyq táýekelderdi aldyn alý qory), EBRD (Eýropalyq qaıta qurý jáne damý banki), EVERYCO Central Asia Kazakhstan, IOSH (Qaýipsizdik tehnıkasy jáne densaýlyqty qorǵaý ınstıtýty), NEBOSH (Ulybrıtanııanyń eńbekti qorǵaý jónindegi ulttyq emtıhan keńesi), OPITO jáne basqa da beldi uıymdardyń sarapshylary boldy. 

Qor ókilderi óndiristik kompanııalarda sońǵy tórt jylda jumys ýaqytyn joǵal­tatyn jaraqat koeffısıentiniń 24 paıyzǵa tómen­deýine qol jetkizilgenin atap ótti. Zar­dap shekkender sany 35 paıyzǵa azaıǵan: 2018 jylǵy 165-ten 2021 jyly 108-ge deıin tómendepti.

Qorda jáne portfeldik kompanııalarda eń­bekti qorǵaý jáne ónerkásiptik qaýip­siz­dik jaǵ­daıyn monıtorıngileý úshin úderister­di avto­mattandyrý jáne sıfrlandyrý, qyzmet­kerlerdi oqytý boıynsha belsendi ju­mys júrg­izilýde. Birqatar portfeldik kompa­nııa­da eseptiliktiń ashyqtyǵynyń jetki­likti deńgeıin, kommýnıkasııalardy damytý­dy jáne qaýipterdi sáıkestendirý men táýe­kel­der­di basqarýdy jeńildetetin basqa da sheshim­derdi qamtamasyz etetin IT-sheshimder iske asyrylǵan.

Osyndaı qadamdar qorǵa jaǵdaıdy boljaı otyryp jáne óndiristik qaýipsizdik salasynda ortaq maqsattarǵa qol jetkizý úshin tıisti is-sharalardy aldyn ala josparlap, portfeldik kompanııalardyń qyzmetine proaktıvti den qoıýǵa múmkindik beredi. Atalǵan baǵytty damytý úshin 2022 jyl «Samuryq-Qazyna» AQ tobynda Qaýipsizdik jyly bolyp jarııalanǵan.

Eske sala keteıik, osy jyldyń 26 mamyrynda KIOSH-2022 Eńbekti qorǵaý jáne ónerkásiptik qaýipsizdik jónindegi X qazaq­standyq halyqaralyq konferensııasynda Eńbek jáne halyqty áleýmettik qorǵaý mınıstrligi, «Samuryq-Qazyna» AQ jáne Halyqaralyq áleýmettik qamsyzdandyrý qaýymdastyǵy arasynda memorandýmǵa qol qoıyldy. Basty maqsat – Qor kompanııalary tobynyń tájirıbesinde Vision Zero nóldik jaraqattaný tujyrymdamasynyń qaǵıdattaryn nasıhattaý.