«Tatneft» ókilderi Mańǵystaý óńiriniń, sonyń ishinde Jańaózen qalasynyń turǵyndarymen kezdesý ótkizdi. Jınalǵandarǵa bos oryndar týraly aıtylyp, eńbek jaǵdaılary túsindirildi.
«Tatneft» kompanııasy 500-ge tarta adamdy jumyspen qamtýǵa daıyn, sonyń ishinde uńǵymalardy paıdalaný jáne barlaý, kúrdeli jóndeý burǵyshylary, burǵyshynyń kómekshileri, mashınıst, slesar, elektr dánekerleýshi, kólik júrgizýshi jáne basqa da mamandardy jumysqa qabyldaıdy.
Sonymen qatar «Tatneft» kompanııasy Oral jáne Aqtóbe qalalarynan jumys ornyna deıin kólikpen jetkizedi, jataqhana beredi, qajetti oqytý jáne qaıta oqytý júrgizedi.
Jumysshylarǵa vahta ádisimen jumys isteý usynylyp otyr. Bir aı jumys istep, bir aı demalady. Bul rette jumysshylarǵa laıyqty jalaqy da tólenedi. Aıtalyq, uńǵymany burǵylaý jáne kúrdeli jóndeý salasyndaǵy ortasha eńbekaqy 78,5 myń rýbl, mehanıkalyq jabdyqty jóndeý salasynda – 52,5 myń rýbl, al kólik júrgizýshilerdiń jalaqysy 55 myń rýbldi quraıdy. Ortasha jalaqy kóleminde vahtada bolatyn kezeńdegi jáne vahtaaralyq demalysqa beriletin jalaqy qosa eseptelgen.
Búginde Mańǵystaý oblysyna qarasty aýdandar men qalalardan 500-den asa úmitker ótinish berdi. Onyń 178 adamy irikteýden ótti.
Jumyssyz azamattardan ótinish qabyldaý áli de jalǵasýda. Mańǵystaý oblysynyń jumyspen qamtýdy úılestirý jáne áleýmettik baǵdarlamalar basqarmasy bergen aqparaty boıynsha taǵy 170 adam jumysqa ornalasýǵa nıet bildirdi. Endi shilde aıynyń ortasynda úmitkerlerdi irikteýdiń ekinshi kezeńi ótedi.
«Tatneft» ókilderi úmitkerlerdi irikteý jáne testileýdi Aqtaý qalasynda ótkizedi.
Bul ulttyq kompanııanyń óńirdegi áleýmettik turaqtylyqty saqtaý baǵytyndaǵy jalǵyz bastamasy emes ekenin aıta ketý kerek. Qazirgi ýaqytta Mańǵystaý oblysyn áleýmettik-ekonomıkalyq damytýdyń 2021-2025 jyldarǵa arnalǵan keshendi jospary aıasynda ulttyq kompanııanyń qatysýymen óńirde 425 mlrd teńge somasyna eseptelgen 22 joba men is-shara josparlanǵan. Bul kásiporyndar toby men olardyń merdiger uıymdarynda áleýmettik turaqtylyqty saqtaý, ınvestısııalyq jobalardy iske asyrý, jańa jumys oryndaryn ashý, sondaı-aq áleýmettik jobalardy qarjylandyrý sharalaryn qamtıdy.
