О́tken jylmen salystyrǵanda sybaılas jemqorlyqty anyqtaý eki eseden astam ósken, ıaǵnı 33 qylmystan 71 sybaılas jemqorlyq faktisine deıin artyp otyr.
Salalar boıynsha anyqtalǵan qylmystardyń eń kóp sany quqyq qorǵaý blogynda – 30 fakt, sonymen qatar densaýlyq saqtaý salasynda – 27, qurylys – 6, mádenıet – 5, bilim salasynda – 3 jáne áleýmettik qamtamasyz etý salasynda 1 qylmys tirkelgen. Tirkelgen qylmystardyń ishinde paraqorlyq – 58 (para alý – 21, berý – 33, deldaldyq – 4), jymqyrý – 11 jáne ókilettigin teris paıdalaný faktileri basym.
Bul derekterdi polısııa qataryndaǵy sybaılas jemqorlyqqa qarsy birlesken kúrestiń aralyq nátıjeleri boıynsha ótken brıfıngte Agenttiktiń Shymkent qalasy boıynsha departamenti basshysynyń orynbasary Dáýren Qojabaev pen Shymkent qalasy Polısııa departamenti bastyǵynyń orynbasary Murat Altaev málim etti.
Spıkerlerdiń aıtýynsha, bıyl polısııa departamenti men Sybaılas jemqorlyqqa qarsy qyzmetpen birlesken jedel is-sharalar barysynda patrýldik polısııa polkiniń birqatar qyzmetkerleri ustaldy. Olar 2018 jyldan bastap anyqtaý sharalarynda bolǵan. Iаǵnı, tórt jyl ishinde jedel ýákilder barlyq qajetti dálelderdi jınaǵan. Nátıjesinde, osy jyldyń sáýir aıynyń sońynda jedel is-sharalardy júrgizip, polk qyzmetkerlerin ustaýǵa múmkindik boldy. Olar para berý jáne alý jaıttaryna qatysy bar degen kúdikke ilindi.
Brıfıngte sáýirde qyzmet babyndaǵy qamqorlyǵy úshin qaramaǵyndaǵy qatardaǵy ofıserlerden 174 myń teńge mólsherinde para alǵany úshin 4-rotanyń komandıri ustalǵany derekterdiń biri retinde aıtyldy.
Sondaı-aq rota komandıri zańda kózdelgen demalys kúnderin bergeni úshin qol astyndaǵylardan 2 myń teńge mólsherinde júıeli túrde para alǵan.
Joǵaryda kórsetilgen faktiler boıynsha qylmystyq qýdalaýǵa 30-dan astam polısııa qyzmetkeri men olardyń sybaılastary tartylǵan, onyń ishinde 4 aıyptalýshy sottyń sanksııasymen qamaýǵa alynǵan.
Sybaılas jemqorlyqqa qarsy qyzmet pen Ishki ister mınıstrligi qol qoıǵan ózara yntymaqtastyq týraly memorandým aıasynda sybaılas jemqorlyqqa qarsy is-qımyl salasynda ózara qyzyǵýshylyq týdyratyn aqparat almasý, birlesken jedel-izdestirý is-sharalaryn júrgizý, sybaılas jemqorlyq táýekelderine monıtorıng jáne taldaý júrgizý kózdelgen.
Qazirgi ýaqytta sybaılas jemqorlyq táýekelderine syrtqy taldaý polısııa departamentiniń kóshi-qon qyzmetiniń jumysyna júrgizilýde.
