Atyraýda qashyp ketken polısııa bastyǵynyń óli denesi tabyldy

ATYRAÝ. 28 sáýir. Osydan birer kún buryn para alý kezinde ustalyp, artynan qashyp ketken Atyraý oblysy Isataı aýdandyq ishki ister bóliminiń bastyǵy Altynbek Qubaıdýllınniń óli denesi tabyldy. Bul týraly «Aq Jaıyq» gazeti habarlady. Aýdandyp polısııa bastyǵy tergeý kezinde qan qysymy kóterilip, sodan aýrýhanaǵa jetkiziledi. Ol sol jerden ebin taýyp qashyp shyqqan. Atalǵan basylymnyń habarlaǵanyndaı, Altynbek Qubaıdýllınniń óli denesi 27 sáýirde Atyraý qalasynyń Gýrevskıı kóshesindegi qurylys nysandarynyń birinen tabylǵan. Qazirgi joramal boıynsha, ol óz-ózine qol salǵan bolýy múmkin. Osyǵan qatysty jurtshylyqtyń arasynda ártúrli alyp-qashpa áńgimeler aıtylýda. Bireýler ony kisi qolynan qaza tapty dep sanaýda. Degenmen, munyń jaı-japsary sot-medısınalyq saraptamadan keıin belgili bolmaq. Esterińizde bolar, Isataı aýdandyq ishki ister bóliminiń bastyǵy A.Qubaıdýllın 250 myń teńge kóleminde para alý kezinde qarjy polısııasynyń qolyna túsken. Sol sátte odan 3 kılogramm qara ýyldyryq ta tárkilengen edi. Qazir osy tizbekti oqıǵaǵa qatysty tıisti oryndar tekserý jumystaryn júrgizýde. Joldybaı Bazar. Derekkóz: «Aq Jaıyq» gazeti. Foto: egemen.kz.