Atyraýda 13 jyl óliler tiziminde bolǵan ardager anyqtaldy

ATYRAÝ. 28 sáýir. Atyraýda Uly Otan soǵysynyń ardageri, búginde saý-salamat júrip jatqan Aleksandr Pogadaev degen qarııa 13 jyldaı óliler tiziminde turǵan. Bul týraly «QazAqparat» habarlady. Baqandaı 13 jyl qaıtys bolǵandar qataryna jatqyzylyp kelgen Aleksandr Pogadaev sáti túsip, qaıtadan tiriler tizimine engizildi. Soǵys ardageriniń nemeresi Olga Sbıtneva: «Bizge jiberilgen qateliktiń túzetilgeni habarlandy. Endi meniń atam halyqqa qyzmet kórsetý ortalyǵyna kez kelgen anyqtama alý úshin júgine alady», – dedi. Aleksandr Pogadaevtiń óliler tiziminde ekeni kezdeısoq anyqtalypty. Qarııa halyqqa qyzmet kórsetý ortalyǵyna meken-jaı anyqtamasyn alýǵa barady. Al ortalyq qyzmetkerleri oǵan: «A.Pogadaev degen azamat týraly málimet bazamyzda joq, ol 2001 jyldan ólgender qatarynda», – degen mazmundaǵy keleńsiz habardy jetkizedi. Muny estigen ardager ań-tań qalady... Qarııanyń nemeresi Olga Sbıtneva: «Biz qatelikti túzetýdi suradyq. Ketken kemshilikti jóndeý kóshi-qon polısııasynyń quzyryndaǵy is eken. Sosyn atamyzdyń jer basyp júrgenin rastaıtyn medısınalyq qorytyndy talap etildi. Biz suraǵan anyqtamasyn aparyp berdik. Arada birshama ýaqyt ótken soń halyqqa qyzmet kórsetý ortalyǵynan atamyzdyń meken-jaı anyqtamasyn alý úshin eshqandaı kedergi bolmaıtyny habarlandy. Bul Jeńis kúnine oraı úlken syılyq boldy», – dedi. Aleksandr Pogadaev osal adam emes kórinedi. Ol – Uly Otan soǵysynyń ardageri ári otstavkadaǵy ishki ister polkovnıgi. Sondaı-aq, bul qarııa atyraýlyq tanymal «Frontovıchka» soǵys jáne eńbek ardagerleri horynyń ánshisi retinde de belgili. Bıyl 90 jasqa tolatyn ardager Jeńis kúni merekesine baılanysty uıymdastyrylǵaly otyrǵan konserttik sharalarda óner kórsetpek. Joldybaı Bazar. Derekkóz: «QazAqparat». Foto: Kostanay.gov.kz.