Sport • 04 Shilde, 2022

Jastar jasyndaı jarqyldady

77 ret kórsetildi

Qaraǵandyda grek-rım kú­resine Qazaqstan chempıo­naty óz máre­sine jetti. «Kla­­sıkterdiń» ja­rysynda tosyn nátıjeler kóp tir­keldi. Ásirese sheshýshi tusta ataǵy alysqa jaıylǵan ba­lýan­­dardyń birazy súrindi. Olardy tuǵyrdan taıdyrǵan ja­­lyndy jastar kenshiler qa­la­syndaǵy sport keshenine jınalǵan jan­kúıerlerdiń ys­tyq yqylasy men zor qoshe­metine bólendi.

Grek-rım kúresinen ótken ja­rystyń alǵashqy kúni 63 kılo salmaq dárejesiniń basty favorıti sanalǵan álem chempıonatynyń eki dúrkin, qurlyq birinshiliginiń tórt dúrkin jáne Azııa oıyndarynyń júldegeri, aqtóbelik Meırambek Aınaǵulov jeńis tuǵyryna kóterile almady. Jartylaı fınalda ol Almaty oblysynyń ókili Ǵalym Qabdýnasyrovqa ese jiberdi. Negizi bul báseke 12:12 esebimen aıaq­talǵan edi. Ondaı jaǵdaıda jasalǵan ádistiń sapasy eskeriletini málim. Bul rette Ǵalymnyń asyǵy alshysy­nan tústi. Úshinshi oryn úshin tartysta Meırambek shymkenttik Jol­dybaı Toqbaevqa jol berdi. Al fınal­da soltústikqazaqstandyq Rýs­tam Mámedovtiń tas-talqanyn shyǵa­ryp, aıqyn basymdyqpen utqan Qabdý­nasyrov el chempıony atandy.

77 kılo salmaqta básekelestik óte kúshti boldy. Jıyrmadan asa balýannyń arasynan tórt myqty sýyrylyp shyǵyp, bas júldeni ózara sarapqa saldy. Jartylaı fınalda atyraýlyq qos sańlaq – Maqsat Erejepov (Azııanyń chempıony, eki dúrkin kúmis jáne úsh dúrkin qola júldegeri) pen Kaharman Qısymetov (23 jastaǵylar arasyndaǵy álem jáne qurlyq birinshilikteriniń qola júldegeri) arasyndaǵy aıqas alǵash­qysynyń paıdasyna sheshildi. Qos­tanaılyq Temirlan Shadýkaev (jastar arasyndaǵy álem chempıony, ere­sekter arasynda Azııa chempıony) Almaty oblysynan kelgen saqa sportshy Demeý Jadyraevqa (álem chem­pıonatynyń kúmis júldegeri) jer sıpatyp ketti. Fınalda Shadýkaev pen Erejepov kúresti. Byltyrǵy el chempıonatynda osy balýandar ózara sheberlik baıqasyp, sol tartysta Maqsattyń mereıi ústem bolǵan. Bul joly Temirlan ketken eseni qaıtardy. Qarsylasy alǵa umtylǵan kezde eki márte qarymta shabýylyn sátti júzege asyrǵan Shadýkaev qorytyndy esepte 7:1 esebimen jeńiske jetti.

Alyptardyń aıqasynda Anton Savenkonyń aıdarynan jel esti. Fı­nalda almatylyq balýan Azııa chem­pıony, shymkenttik Álimhan Syz­dyqovpen kúsh synasty. Bul kezdesýde Syz­dyqovtyń jeńiske jetetinine kúmándanǵandar kemde-kem edi. Desek te, jas daryn saqa sportshynyń óres­kel qateligin utymdy paıdalanyp, báseke taǵdyryn óz paıdasyna sheshti. Eń jeńil salmaqta jetisýlyq Ishar Qurbaevtyń asyǵy alshysynan tústi. Sheshýshi tusta ol jetisýlyq Marlan Muqashevty qapy qaldyrdy. 87 kılo salmaqta Azııa chempıonatynyń jeńimpazy, Olımpııa oıyndaryna qaty­sýshy óskemendik Nursultan Tur­synovqa teń keler eshkim tabylmady. Aqtyq saıysta ol qyzyljarlyq Baýyrjan Mýsınnen basym tústi.

Jarystyń ekinshi kúni taǵy bes salmaq dárejesi boıynsha túrli-tústi medaldar sarapqa salyndy. Sol kúni Dinmuhamet Qoshqardyń asqan sheberligine tánti boldyq. Bastapqy básekelerde qarsylastaryn sypyra utqan Jambyl oblysynyń jampozy jartylaı fınalda Madııar Máltekbaevty súrindirdi. Aqtyq synda Dinmuhamettiń joly óziniń komandalyq áriptesi, Azııa chempıony Sultan Ásetulymen qıysty. Ataqty qarsylasynan esh qaımyqpaǵan jas daryn utyp jatsa da, qarqynyn esh báseńdetken joq. Ásetulyn tórttaǵanda ary da, beri de aınaldyrǵan Qoshqar bul beldesýde aıqyn basymdyq tanytty – 9:1.

60 kılo salmaqta qyzylordalyq Aıdos Sultanǵalıdiń shoqtyǵy bıik boldy. Álem chempıonatynyń qola júl­degeri fınalda elimizdiń taǵy bir tájirıbeli balýany, shyǵys­qazaqstandyq Ernur Fıdahmetovti eńserdi. 72 kılo salmaq dárejesiniń bas júldesin qaraǵandylyq Ibragım Magomadov pen jetisýlyq Erasyl Nurbosynov ózara sarapqa saldy. Bul tartysta jarys qojaıyny óziniń myq­tylyǵyn moıyndatty. 82 kılo salmaqta Jetisý oblysynyń óreni Dıas Qalenniń qarqyny kúshti boldy. Sheshýshi tusta ol qostanaılyq Mıras Barshylyqovtyń osal tusyn dóp tapty. 97 kılo salmaqtaǵy saıys ta óte shıelenisti ótti. Qyzylordalyq Oljas Syrlybaı men qaraǵandylyq Er­ulan Ysqaqov beldesip, bul básekede jer­gilikti balýan jeńis toıyn toılady.

Jalpy komandalyq esepte Almaty oblysynyń órenderi aldaryna jan salmady. Shyǵys Qazaqstan oblysy men Shymkent qalasynyń ókilderi ekinshi jáne úshinshi oryndardy ózara bólisti. Sondaı-aq Qaraǵandy men Soltústik Qazaqstannyń sportshylary úzdik bestiktiń qataryna endi. Al Batys Qazaqstan, Mańǵystaý jáne Pav­lodardyń balýandary birde-bir upaıǵa ıelik ete almaı, kósh sońynda qalyp qoıdy.      ­­

Sońǵy jańalyqtar

Uqsas jańalyqtar