Qazaqstannan 111 memleket daıyn ónimder satyp alady

ASTANA. 28 sáýir. Qazirgi tańda álemniń 111 memleketi qazaqstandyq kásiporyndar shyǵarǵan daıyn ónimderdi satyp alýda. Búgin M.Lomonosov atyndaǵy Máskeý memlekettik ýnıversıtetinde eýrazııalyq yqpaldastyq taqyrybyndaǵy dárisi barysynda Qazaqstan Prezıdenti Nursultan Nazarbaev osylaı málim etti. Bul týraly «QazAqparat» habarlady. «Biz qashanda «shıkizatty memleket» bolǵan edik. Bul turǵydan Reseımen uqsas elmiz. Sondyqtan da, ekonomıkanyń negizgi basymdyǵyn eksportqa burýdy qolǵa aldyq. Nátıjesinde elimizde buryn shyǵarylmaǵan 250 ónim túri paıda boldy, al qazirgi tańda álemniń 111 memleketi qazaqstandyq kásiporyndar shyǵarǵan daıyn ónimderdi satyp alýda», - dedi Nursultan Nazarbaev. Sonymen qatar Elbasy Qazaqstan TMD keńistiginde alǵashqy bolyp «jasyl» ekonomıkany damytý strategııasyn qabyldaǵanyn jetkizdi. «2017 jyly «EKSPO-2017» halyqaralyq kórmesi ótedi. Onyń basty taqyryby - «jasyl» ekonomıkany damytý. Osyǵan oraı bizdiń ǵalymdarymyz birlese jumys istep, búkil álemge osy baǵyttaǵy jobalardy pash etýlerine de bolatyn edi», - dedi Memleket basshysy. Sondaı-aq Prezıdent búgingi tańda elimizde buǵan deıin bolmaǵan ekonomıkanyń jańa negizderi qalyptasyp jatqanyn da atap ótti. Onyń ishinde avtomobıl salasy, avıaqurylys, teplovozdar men temirjol kóligin shyǵarý, jer serigin damytý sekildi salalar bar. «Aýyl sharýashylyǵy salasy da azyq-túlik óndirisiniń óńirlik ortalyǵy retinde jedel damyp kele jatyr. Qazaqstan buǵan deıin 10-12 mln. tonna astyqty eksporttap kórmegen edi», - dedi Memleket basshysy. Qurysh Nurymbet. Derekkóz: «QazAqparat». Foto: www.socio.msu.ru.