Elbasy «Nazarbaev Ýnıversıtetimen» yntymaqtastyq jaıyn sóz etti

ASTANA. 28 sáýir. Búgin M.Lomonosov atyndaǵy Máskeý memlekettik ýnıversıtetindegi dárisi barysynda Qazaqstan Prezıdenti Nursultan Nazarbaev MMÝ professorlarynyń «Nazarbaev ýnıversıtetimen» yntymaqtasa jumys isteıtinine senim bildirdi.Bul týraly «QazAqparat» agenttigi habarlady. Eske sala keteıik, Memleket basshysy onda eýrazııalyq yqpaldastyq taqyrybynda dáris oqyǵan bolatyn. Sóz arasynda Elbasy Qazaqstanda álemdik deńgeıdegi jańa ýnıversıtet ashylǵanyn, elimizdiń barlyq óńirlerinde zııatkerlik mektepteri jumys istep jatqanyn jetkizdi. «Men osy jyldar ishinde qandaı da bir nysanǵa óz atymdy berýge ruqsat bermegen edim. Biraq munda másele bilim týraly bolyp otyr, sondyqtan da Úkimettiń de, basqanyń da nazaryn aýdarýǵa, meniń atymnyń bilimdi damytýǵa járdemi bolsa, oǵan nege kelispeske? Osy oqý orny «Nazarbaev ýnıversıteti» dep atalady», - dedi Qazaqstan Prezıdenti. Sonymen qatar Elbasy ýnıversıtet týraly aıta kele, onyń erekshe mártebesine toqtalyp, osy oqý orny úshin erekshe zań qabyldanǵanyn atap ótti. Mundaǵy professorlardyń 70 paıyzy álemniń aldyńǵy qatarly ýnıversıtetterinen shaqyrylǵan, sabaqtar tolyǵymen aǵylshyn tilinde ótedi, álemniń túrli ortalyqtaryndaǵy tárizdi zerthanalar ashylǵan. «Nazarbaev ýnıversıteti» Máskeý memlekettik ýnıversıtetimen yntymaqtasýǵa daıyn. Biz MMÝ professorlary bizde jumys isteýge qyzyǵýshylyq tanytady dep senemiz», - dedi Nursultan Nazarbaev. Sáken Maılybaı. Derekkóz: QazAqparat. Foto: www.matritca.kz.