«Áleýmettik medısınalyq saqtandyrý qory» KeAQ Nur-Sultan qalasy boıynsha fılıaly baspasóz qyzmetiniń habarlaýynsha, Shyǵys Qazaqstan oblysy Jarma aýdany Áýezov aýylynyń 64 jastaǵy turǵyny Kúlimhan Qonaevanyń tize býyny syrqattanǵanyna 20 jyl boldy. Ol kezde jas, kúsh-qýaty mol bolǵan soń aýrýǵa kóp mán bermegen. Úı sharýashylyǵymen, baý-baqshamen aınalysyp, tynym tappaıtyn.
«Men bir orynda otyrmaıtynmyn, únemi qozǵalysta boldym. Tizedegi aýyrsyný bir kúsheıip, bir basylatyn. Sondyqtan bolar, dárigerge barýǵa asyqpadym. Jyldar óte tizem kóbirek aýyra bastady, sońǵy 5-6 jylda sol jaq tizem tipti búgilmeı qaldy. 2018 jyly dárigerler ota jasaý qajet ekenin aıtyp, portalǵa qoıdy. Biraq oılanyp-oılanyp, júreksinip júrdim. Qazaqsha aıtqanda «pyshaqqa túsýge» qatty qoryqtym jáne sońǵy sátte otadan bas tarttym», dep esine alady naýqas.
Júre kele aıaqtyń, tizeniń aýyrýy janǵa bata bastady. Kúlimhan Qurmanǵalıqyzyna taıaqpen júrýge týra keldi, al kólikpen júrý ol úshin tipti úlken synaqqa aınaldy.
«Aıaǵym qaqsap, janǵa batyp, maza bermedi. Bir orynda turyp, uzaq júre almadym, otyrǵan jerimnen turý qıyn boldy. Onyń ústine, 93 kılo salmaǵym bar, qozǵalýym tipti kúrdelene tústi. Meniń bul jaǵdaıymdy kórgen balalarym ota jasatýǵa kóndirdi. Olardyń barlyǵy elordada turady. Munda MÁMS boıynsha tizege tegin ota jasaıtyn ǵylymı ortalyq baryn aıtty. Endi, mine, jarty jyldan keıin men osy keremet dárigerlerdiń qolyna tústim. Operasııaǵa kelisim bergenime ókinbeımin, buryn kómek suramaǵanyma, sonsha jyl qınalǵanyma ókinemin», dedi naýqas.
№7 ortopedııa bólimshesiniń emdeýshi dárigeri Jandos Qalelovtiń aıtýynsha, naýqasta 3 dárejeli ekijaqty deformasııalyq gonartroz bolǵan.
«Bul aýrý kezinde jilinshik pen san súıeginiń bir bóligin jabatyn shemirshek tinderi zardap shegedi. Aýyr salmaqqa, kóp júktemege baılanysty aýrý damı beredi, nátıjesinde býyn birte-birte buzylyp, súıektiń zaqymdanýy, onyń keıingi patologııalyq ósýi men tyǵyzdalýy baıqalady. Jaıaý júrgende qatty aýyrsynyp, býyndarda suıyqtyq jınalady, al keıingi kezeńderde aıaqqa turý tipti múmkin bolmaı qalady», deıdi dáriger.
Kúlimhan Qurmanǵalıqyzynyń sol jaq tize býynyna endoprotez ornatyldy. Operasııadan soń bir aptadan keıin aýrýhanadan shyqty. Al birneshe ońaltý kýrsynan keıin burynǵysha qalypty erkin qozǵalatyn bolady.
